"Azərbaycan"ın avqust sayında

"Azərbaycan" jurnalının 8-ci sayı Ağasəfanın "Göylərdən baxan uşaq" adlı silsilə şeirlərilə açılır. Sonra gəlir Təranə Musayevanın türkcədən uyğunlaşdırılmasında türkiyəli yazar Sərdar Özkanın "Kayıp Gül" romanının davamı.

Ramiz Qusarçaylının şeirləri ilə davam edən yeni say yazıcı-publisist Asim Cəlilovun 75 yaşını Məmməd Orucun "Sözün üfüqlərində" yazısı və yubilyarın "Sonuncu güllə" hekayəsilə qutlayıb.

İbrahim İlyaslı, İltifat Saleh, Bahadur Fərman, Gülağa Tənha, Qədiməli Əhməd və Kəmalənin yeni şeirləri, Mahmud Əhmədin "Tarçalan Zeynal", Aliq Nağıoğlunun "Hörmət"sizliyin cəzası", Nurəddin Ədiloğlunun "At ətindən kolbasa", Əzizağa Elsevərin "Ağrı", Əli Həsənin "Rüşvət" hekayələri də bu sayda təqdim olunub.

Jurnalın "Yeni tərcümələr" bölümündə Həmzəli İlyasın çevirməsində çağdaş rus nəsrinin tanınmış nümayəndəsi Viktoriya Tokarevanın "Xoşbəxt sonluq" hekayəsi, "Qarabağ: ağrılarımız, acılarımız" bölümündə Vahid Məhərrəmlinin "Qoşa Məzar", "Dünyaya pəncərə" bölümündə Cəlal Bəydilinin (Məmmədov) "Dünya mənən yenidən doğulmalı" yazıları yer alıb.

Yeni sayın "Adlarda yaşayan tarix" bölümü Adil Bağırovun "Naxcıvanda sancaq, nahiyə və qəza adları", "Gənc tənqidçinin tribunası" bölümü Sədaqət Əsgərovanın "Molla Nəsrəddin" jurnalı və qadın azadlığı məsələsi" məqalələrini təqdim edib.

Jurnalın daimi rubrikalarından olan "Kitablar, rəylər"də tanınmış tənqidçi Vaqif Yusiflinin "Yeni meyarlarla" yazısı yer alıb. Burada Tahirə Məmmədin "XIX əsr Azərbaycan ədəbiyyatı (I hissə)" və Bədirxan Əhmədovun "XX əsr Azərbaycan ədəbiyyatı tarixi ( II hissə)" dərsliklərindən söhbət gedir.

Ulu öndər Heydər Əliyevin anadan olmasının 88-ci ildönümünə həsr olunmuş "Müdriklik zirvəsi" toplusu haqqında jurnalın "Kitab rəfi"ndə məlumat verilir. Yeni sayın bu bölümündə həmçinin Sedat Adıgözəlin Ankarada nəşr olunan "İlyas Əfəndiyevin həyatı və əsərləri", Camal Yusifzadənin "Poeziya", Rəhim Əliyevin "Sözün mifi", Anar Həbiboğlunun "Əlini qoy ürəyimin üstünə", Əmrah Xanməmmədlinin "İlahi sevgi", Nərmin Hüseynzadənin "Qırmızı", Cəmilə Elsevərin "Ağsu: dünəndən sabaha", Məzahir Əhmədoğlunun "Uembli arayışı", Gülbala Teymurun "Məni bu sevgidən qoru, Allahım", Vahid Məmmədlinin " Atropatena dastanı", Zakir Abbasın "Kənar adam", M.T.Ağamirzənin "İlahi nura doğru" kitabları haqqında məlumat verilib.

S.Əsgərli

Ədəbiyyat qəzeti.- 2011.- 19 avqust.- S.5.