Soxulcan

Qarmağa keçirilib

Həmişə versə də can.

Çox balığın başını

Səssiz yedi soxulcan.

Ehtiyat təkər

Yaman xam öyrənmişdi

Bu ehtiyat təkəri; -

Daima kürəklərdə

Gəzmək idi şakəri.

Aldanan köpək

Üstündə sümük verib

Köpəyi aldatdılar,

Boyunbağı adına

Boz xaltanı satdılar.

Sürüyə girişdi

Aşkarlıq canavarı

Çox məmnun eləmişdi:

Günün günorta çağı

O, sürüyə girmişdi.

Zəhmətsevən kəlbətin

- Zəhmətsevənəm - deyib

Hamını dişləyirdi;

Kəlbətin başqasını

Sıxmaqla işləyirdi.

Mənasız "yaxşılıq"

Ata bağışladılar

Yaşıl otu, çəməni -

Ancaq çıxarmadılar

Ağzındakı yüyəni.

"Həssas" yamaq

Özünü çox dartırdı,

Şişirdirdi hey yamaq, -

Deyirdi: - Asan deyil

Kasıbları anlamaq.

Ocaq hərarəti

Günəş olmağa

Çalışdı ocaq, -

Yandığı yeri

Qaraltdı ancaq.

Toyuq çaşqınlığı

Toyuq baş açmayırdı

Nə hoqqadı, nə sirdi?

Tülkü hinin önündə

Əlində gül gəzirdi.

Kömür un kisəsində

Kömür girmişdi

Un kisəsinə, -

O üzüqara

Qayıtdı yenə.

Qoyun kütlüyü

Görüb qurdun yurdunda

Asılmış dərisini -

Qoyun fikrə getsə də,

Anlamadı dərsini.

Kəlbətin öyüdü

Həyatda gərək

Olasan mətin.

Öyüd verirdi

Mıxa kəlbətin.

Dil tökən tülkü

Tülkü azmanı

Tutmuşdu dilə;

Qəsdi bu idi

O, minsin filə.

Torun verdiyi azadlıq

Tor dedi: - Sevir

O, azadlığı

Sudan quruya

Atdı balığı.

Düzlüyün düşməni

Baxıb nəhəng qatara

İlan ağız əyir ki:

- Bu hərif hey düz gedir,

Qıvrıla bilməyir ki...

Açılmayan tüfəng

Tüfəng çiynində gəzib,

Günlərini sayırdı;

Dovşanın əlindəydi, -

Heç vaxt açılmayırdı.

Dəvət

Çaqqalın iradını

Çatdırdılar kəkliyə:

- Qayalıqda dolanır, -

Hinə gəlməyir niyə?

Nar riyakarlar əlində

Əvvəlcədən möhkəmcə

Sıxmış idilər narı.

Dedilər ki, süfrəyə

Gəlməyə yoxdur halı.

Mərkəz Qacar

Ədəbiyyat qəzeti.- 2011.- 26 avqust.- S.4.