Asim Cəlilov - 75
Hörmətli Asim müəllim!
Sizi - tanınmış yazıçı-jurnalisti 75 illik
yubileyiniz münasibətilə
təbrik edirik.
Siz 1936-cı ildə Azərbaycanın qədim
şəhəri olan Şuşada anadan olmusunuz. İlk təhsilinizi Bakıdakı
29 və 3 saylı orta məktəblərdə
almış, doqquzuncu
sinfi bitirəndən sonra İrəvandakı xüsusi hərbi hava qüvvələri məktəbində oxumusunuz.
1953-1954-cü illərdə
Ukraynada hərbi təyyarəçilik məktəbində,
1959-1960-cı illərdə Azərbaycan Dövlət Bədən Tərbiyəsi
İnstitutunda, 1961-1967-ci illərdə
ADU-nun filologiya fakültəsində
təhsil almısınız.
1959-cu ildən "Molodej Azerbaydjana" qəzetinin
əməkdaşı olmuş,
1963-cü ildə "Pionerskaya
pravda" qəzetinin
Zaqafqaziya üzrə xüsusi müxbiri işləməyə başlamış,
1967-1972-ci illərdə "Molodej Azerbaydjana" qəzetində baş redaktor kimi fəaliyyət
göstərmisiniz. 1972-1975-ci illərdə Sov.İKP
MK-nın yanında İctimai Elmlər Akademiyasında təhsil almış, burada elmi iş müdafiə
edərək filologiya
elmləri namizədi adı almısınız.
Siz 1975-1979-cu illərdə
Azərbaycan Dövlət
Teleqraf Agentliyində
(Azərinform) direktor müavini, 1979-cu ildən C.Cabbarlı adına
"Azərbaycanfilm"də baş redaktor və direktor müavini kimi əmək fəaliyyətinizi
davam etdirmiş, "Bakinskiy raboçiy" qəzetinin baş redaktoru işləmisiniz
(1991-1995). Hazırda "Ədəbiyyat
qəzeti"nin əlavəsi kimi nəşr olunan "Mir literaturı" qəzetinin
şef redaktoru, əməkdar jurnalistsiniz.
İlk qələm təcrübəniz 1959-cu ildə
"Molodej Azerbaydjana"
qəzetində işıq
üzü görüb,
ilk kitabınız 1968-ci ildə
"Gənclik" nəşriyyatı
tərəfindən nəşr
edilib.
Sizin ssenariləriniz əsasında "Yol əhvalatı", "Avqust
ayı gələndə",
"Yayda yarpaq tökümü", "Şeytan
göz qabağında"
bədii filmləri ekranlaşdırılıb. "Mozalan" satirik kinojurnalı 15-ə qədər
süjet hazırlayıb.
Çoxşaxəli yaradıcılığınızı
əhatə edən üçcildlik "Zaman
həmişə bizimlədir"
kitabınız işıq
üzü görüb.
Hörmətli Asim müəllim!
Sizi bir daha
75 illik yubileyiniz münasibətilə təbrik
edir, sizə uzun ömür, can sağlığı, yaradıcılığınızda
uğurlar arzulayırıq.
Azərbaycan Yazıçılar Birliyi
Ədəbiyyat qəzeti.- 2011.- 26
avqust.- S.4.