Düşür

Yadından çıxmışam ana vətənin, -

Gərək barmağına sap bağlayaydım.

Məmməd İsmayıl

Zamanın acısın biz çəkirik, biz, -

Acı görməyənə sədəf, dürr düşür.

Bircə damlasını qıymayır bizə, -

Kimə Araz düşür, kimə Kür düşür.

Axı yarandığım günə nə deyim,

Qəm üstə köklənib yaralı neyim;

Uğursuz şeirdi mənim taleyim, -

Ya duyğu çatışmır, ya fikir düşür.

Nə deyim bu qanlı fələyə, Məmməd,

Yol açır hər dürlü kələyə, Məmməd;

Dovşana qurulan tələyə, Məmməd,

Möcüzə olanda, gəlib şir düşür.

Sənə yalvarıram, haçandan sənə,

Bilirsən bağlıyam mən candan sənə;

Sitəmlər verdiyin insandan sənə,

Tanrım, özün söylə gör, zikir düşür?

Ədalət istədim, ədalət Haqdan,

Odu var eləyən hər şeyi yoxdan;

Narazı olsam da taledən, baxtdan,

Dilimdən Allaha çox şükür düşür.

Dilini bilsəm də qayanın, daşın,

Heç vaxt ayrılmadı bəladan başım;

Kiminə ev gəlir, kiminə maşın, -

Dayandur Sevginə təşəkkür düşür.

Telefon zəngimə

cavab verməyən bir xanıma

Əllərin üzündə qalar, ilahi

Bəşər gözləriynən baxsan rəngimə.

Nolar bu gözələ insaf verginən,

Bircə cavab versin mənim zəngimə.

Dəryada gəmiyəm, uçub yelkənim,

Külək yellədikcə əsər kəndiri.

Asılı qalmışam dar ağacından,

Bircə "alo" sözü kəsir kəndiri.

Dillənə qəlbinin kaş sarı simi,

Duyam istisini kövrək səsinin.

Nolardı barmağı kəpənək kimi

Qonaydı üstünə “yes” düyməsinin.

Bu başda həyəcan, o başda sükut,

Aya-ilə dönür hər keçən anım.

Çağırır, çağırır telefon - susur,

Bir cavab verməyir qəlbi daş xanım.

Sən bizi sevgidən yaratdın axı,

Ən ülvi sevgilər adından çıxıb.

Tanrım, bu gözələ hər şey vermisən,

Bircə ürək vermək yadından çıxıb…

***

Şeytan əməlidir bu gözəlliyin,

Tanrı axıtmazdı belə qanları.

Qara kirpiklərin xilas eyləməz,

Dərya gözlərində boğulanları.

Kövrəlsən, gözündən bir damcı düşsə,

Silməyə hər cibdən bir yaylıq çıxar.

Sən tutub gedərsən vüsal yolunu,

Nədənsə qarşına ayrılıq çıxar.

Sonuncu nəğməsin oxuyan qu da,

Son dəfə ürəkdən dinmək istəyir.

Sənin göz yaşından sellənən suda,

Kimdir o bəxtəvər - çimmək istəyir…

Dayandur Sevgin

Ədəbiyyat qəzeti.- 2011.- 2 dekabr.- S.5.