Yəhya Şeyda anıldı

Dekabrın 14-də AYB-nin Natəvan klubunda Güney Azərbaycanda yaşayıb-yaratmış şair-ədəbiyyatşünas Yəhya Şeydanın anım mərasimi keçirildi.

Tədbiri xalq şairi Söhrab Tahir açaraq Y.Şeydanın bənzərsiz yaradıcılığından ətraflı danışdı.

Mərasimin təşkilatçısı, AYB-nin Güney Azərbaycan şöbəsinin məsul işçisi Sayman Aruz da sənətkarın ədəbi-bədii, elmi fəaliyyətinin özəlliklərini incələdi.

Filologiya elmləri doktoru Sabir Nəbioğlu çıxışında vurğuladı ki, Yəhya Şeydanın yaradıcılığı ilə 1979-cu ildən tanışdı: "Onun milli təəssübkeşliyi, azadlıq duyğusu bizi doğmalaşdırmışdı. Vətənpərvərlik mövzusu Yəhya Şeyda yaradıcılığının əsasını təşkil edir. O, böyük vətəndaş idi..."

Filologiya üzrə fəlsəfə doktoru Esmira Fuad da diqqəti Y.Şeydanın yaradıcılıq özəllikləri üzərinə çəkdi. Vurğuladı ki, o, həmişə milli azadlıq ideyalarına, dilimizin saflığını təbliğ etmiş, yasaqlara boyun əyməmişdir: "Hətta şah rejiminin boğuntu və sıxıntıları belə ustad sənətkarı susdura, haqq yolundan çəkindirə bilməmişdir. Onun ölümü ədəbiyyatımız, daha çox da Cənub ədəbi mühiti üçün ağır itki oldu."

S.Aranlı

Ədəbiyyat qəzeti.- 2011.- 30 dekabr.- S.5.