Nəriman Həsənzadə-80

Hörmətli Nəriman müəllim!

Sizi - görkəmli şair və dramaturqu anadan olmanızın 80 illiyi münasibətilə ürəkdən təbrik edirik.

Yarım əsrdən artıqdır ki, sizin imzanız oxucularımıza tanışdır. Siz bədii yaradıcılığa 1953-cü ildə "Azərbaycan gəncləri" qəzetində dərc etdirdiyiniz şeirlə başlamısınız. Həmin vaxtdan şeirləriniz müxtəlif ədəbi orqanlarda, toplularda ardıcıl dərc olunmuşdur. "Yadına düşəcəyəm", "Nəriman", "Zümrüd quşu", "Mənim gecəm - gündüzüm", "Bir az möhlət istəyirəm ömürdən", "Nabat xalanın çörəyi", "Bütün millətlərə", "Taleyin töhfəsi" və başqa kitablarınız oxucular və ədəbi ictimaiyyət tərəfindən maraqla qarşılanmışdır. Əsərlərinizdə həyatımızın rəngarəng bədii lövhələri, insanların mənəvi-psixoloji dünyası yüksək sənətkarlıqla qələmə alınmışdır. Sizin yaradıcılığınız şəxsi həyəcan, duyğu və düşüncələrinizin tərənnümü, bizi əhatə edən aləmin şairanə ifadəsidir. Vətənə, xalqa, gözəlliyə, tarixi keçmişimizə, müasir həyatımıza, təbiətə münasibət sizin lirikanızın əsasını təşkil edir.

Siz dramaturgiya sahəsində də çalışırsınız. "Bütün Şərq bilsin", "Atabəylər" və başqa pyesləriniz Azərbaycan teatrlarının səhnəsində tamaşaya qoyulmuşdur. Bu mənzum dram əsərlərində Azərbaycan xalqının ən qədim dövrlərindən bu günə qədər keçdiyi mübarizələrlə dolu məşəqqətli, lakin şərəfli yol öz bədii əksini tapmışdır.

Siz bir çox ədəbiyyat nümunələrini, o cümlədən Maqsud Şeyxzadənin "Daşkəndnamə" poemasını, A.Puşkinin, A.Nekrasovun, T.Şevçenkonun, İ.Frankonun, İ.Çavçavadzenin əsərlərini dilimizə çevirmisiniz. Həmçinin sizin də əsərləriniz başqa xalqların dillərinə tərcümə olunmuşdur. Xarici ölkələrdə - indiki MDB məkanında və Yaxın Şərq ölkələrində onlarca kitabınız işıq üzü görmüşdür.

Siz Gəncə Pedaqoji Universitetində və Moskvada M.Qorki adına Ədəbiyyat İnstitutunda təhsil almısınız. "Azərbaycan" jurnalında poeziya şöbəsinin müdiri, "Ədəbiyyat və incəsənət" qəzetində baş redaktor, Mətbuat və informasiya nazirinin müavini vəzifələrində işləmisiniz, eyni zamanda ali təhsil ocaqlarında dərs demisiniz. İndi də bədii yaradıcılıqla yanaşı pedaqoji fəaliyyətinizi davam etdirirsiniz. Azərbaycan Aviasiya Akademiyasında kafedra müdirisiniz.

Ədəbi fəaliyyətiniz dövlətimiz tərəfindən yüksək qiymətləndirilmişdir. Siz Azərbaycanın xalq şairi, əməkdar incəsənət xadimi fəxri adlarına layiq görülmüsünüz. SSRİ-nin orden və medalları, müstəqil Azərbaycan Respublikasının "Şöhrət" ordeni ilə təltif edilmisiniz.

Hörmətli Nəriman müəllim!

Sizi 80 illik yubileyiniz münasibətilə bir daha təbrik edir, sizə uzun ömür, cansağlığı, yaradıcılıq uğurları arzulayırıq.

Azərbaycan Yazıçılar Birliyi

“Ədəbiyyat qəzeti”nin redaksiya heyəti və əməkdaşları səmimi qəlbdən bu təbrikə qoşulurlar.

Ədəbiyyat qəzeti.- 2011.- 18 fevral.- S.1.