Bakıda A.S.Puşkinin anadan olmasının 212-ci ildönümü qeyd edilib

İyunun 6-da Aleksandr Sergeyeviç Puşkinin 212-ci ildönümü Bakının ən gözəl guşələrindən birində ucaldılmış abidəsi önündə qeyd edilmişdir.

Rusiya Federasiyasının Azərbaycandakı səfirliyinin, Səbail rayon İcra Hakimiyyətinin, "Sodrujestvo" Azərbaycan xalqlarının Respublika Həmrəyliyi Cəmiyyətinin təşkilatçılığı ilə keçirilən görüşdə ölkəmizdə fəaliyyət göstərən müxtəlif xalqların mədəni mərkəzlərinin, ali və orta məktəblərin nümayəndələri, tanınmış mədəniyyət və incəsənət xadimləri və KİV təmsilçiləri iştirak etmişlər.

Tədbirdə A.S.Puşkinin şeirləri səsləndirilmiş, nağıllarından parçalar göstərilmişdir.

"Sodrujestvo" Azərbaycan xalqlarının Respublika Həmrəyliyi Cəmiyyətinin sədri Tatyana Kərimova, Rusiyanın ölkəmizdəki səfiri Vladimir Doroxin, xalq yazıçısı Çingiz Abdullayev, Səbail rayon İcra Hakimiyyətinin başçısının birinci müavini Xalidə Bayramova belə bir tədbirin keçirilməsinin Azərbaycan ilə Rusiya xalqları arasında dostluq və mədəni əlaqələrin gücləndirilməsində böyük rolu olduğunu vurğulamış, insanların mənəvi aləminin inkişafında Puşkin poeziyasının əhəmiyyətindən danışmışlar.

Bildirilmişdir ki, Azərbaycanda Puşkin XIX əsrin 20-30-cu illərindən tanınmağa başlanmışdır. Şairin ölümünə ilk əsəri Mirzə Fətəli Axundzadə yazmışdır. Puşkinin şeirlərinin Azərbaycan dilinə tərcüməsi ilə Abbas Səhhət, Mikayıl Müşfiq, Məmməd Rahim, Rəsul Rza məşğul olmuşlar.

Qeyd edək ki, 2001-ci il oktyabrın 12-də Puşkinin Bakıdakı abidəsinin açılışı olmuşdur. Abidənin açılışında Azərbaycan xalqının ümummilli lideri Heydər Əliyev iştirak etmişdir. Həmin vaxtdan hər il iyunun 6-da böyük rus şairinin ad günündə poeziya həvəskarları abidənin önünə gəlirlər.

Ədəbiyyat qəzeti.- 2011.- 10 iyun.- S.2.