Dünya şöhrətli yazıçı
Çingiz Abdullayev ilə görüş
Azərbaycan Diplomatik Akademiyasının (ADA) Kitab Mərkəzində Azərbaycan Yazıçılar Birliyinin katibi, görkəmli
qələm ustası Çingiz Abdullayev ilə görüş və kitablarının "imza
günü" keçirilmişdir.
Tədbirdə
ADA-nın Kitab Mərkəzinin
direktoru Vüqar Zeynalov mərkəz
haqqında məlumat vermişdir. Bildirmişdir ki, mərkəzin
fəaliyyətə başlamasından iki
ay vaxt keçir.
Bu qısa müddətdə
dünya üzrə ən son nəşrlərin
mərkəzə gətirildiyini vurğulayan natiq, həmçinin
qeyd etmişdir ki, bu zəngin
kitab fondundan hər kəs istifadə
edə bilər. Mərkəzin təkcə
ADA-nın tələbələrinə deyil,
bütün kitabsevərlərə
əvəzsiz töhfə olduğunu deyən Vüqar Zeynalov kitabxanada Azərbaycan,
rus və ingilis dillərində müxtəlif
çeşiddə kitabların mövcud olduğunu bildirmişdir.
Məlumat
verilmişdir ki, bənzəri
olmayan mərkəzdə
internet, buraya gələnlərin istirahəti
üçün kafe,
yeni kitablarla tanışlıq məqsədi
güdən oxu zalı, oxucuların
kitabları asanlıqla axtarıb tapmasına xidmət edən
elektron avadanlıq mövcuddur. Burada uşaqlar
üçün ayrıca bölmə
yaradılmışdır. Mərkəzdə işləyən
işçilər maraqlandıqları kitabları tapmaqda oxuculara yardımçı olurlar.
Diqqətə çatdırılmışdır
ki, bundan sonra Kitab Mərkəzində
kitab təqdimatları, tanınmış
şair və yazıçılarla görüşlər
keçiriləcəkdir. Bu silsilədən ilk görüş dünya şöhrətli yazıçı Çingiz Abdullayevlədir.
İlk dəfə mərkəzə gəldiyini
deyən Ç.Abdullayev burada
yaradılmış şəraitin
yüksək səviyyədə olduğunu
diqqətə
çatdırmışdır. Gənclərimizin mərkəzə
gəlib mütaliə ilə məşğul olacaqlarına
inamını ifadə edən natiq bunun xalqın mədəniyyəti
və gələcəyinə xidmət edəcəyini demişdir. Görkəmli
yazıçı ADA-nın rəhbərliyinə,
tədbirin iştirakçılarına və təşkilatçılarına
minnətdarlığını bildirmişdir.
Yazıçının "Qisasın
gücü", "Göy
mələklər", "Bakinski bulvar" və digər
kitablarının nümayiş olunduğu tədbirdə Ç.Abdullayev oxuculara öz yaradıcılığı,
yazdığı son kitablar
haqqında danışmış,
onların kitablarını imzalamışdır.
Görüşdə
yazıçı oxucularının, gənclərin, tələbələrin
ona ünvanlanan suallarını cavablandırmış və onlarla xatirə şəkli çəkdirmişdir.
Ç.Abdullayevin əsərləri
28 dilə tərcümə edilmiş və MDB ölkələrində, eləcə
də ABŞ, Fransa, İsveç, Türkiyə, Bolqarıstan,
İsraildə ümumi tirajı
16 milyon nüsxə ilə nəşr olunmuşdur.
Ədibin 600-dən çox
kitabı dünyada
yayılmışdır. Amerikanın "Krisçen
Sayans Monitor"
jurnalı onu müasir
dövrün siyasi detektiv janrında yazan ən yaxşı
müəlliflərdən biri kimi dəyərləndirmişdir. Ç.Abdullayev 2009-cu ildə
Azərbaycanın ədəbi həyatında fəal
iştirakına görə "Şöhrət" ordeni ilə təltif edilmişdir.
AzərTAc
Ədəbiyyat
qəzeti.- 2011.- 17 iyun.- S.3.