"Hər igid bir ordudu"

Əziz Musa. "Mübariz dastanı". "Mütərcim" - 2011

"Bu torpaq Koroğlunun, Cavanşirin yurdudur, hər oğul bir vətəndir, hər igid bir ordudur" - düşüncəsi, məramı ilə baş-başa yazılıb Əziz Musanın Azərbaycanın Milli Qəhrəmanı Mübariz İbrahimovun mənalı, bütün Türk dünyasının qürur yeri olan ömür yolundan bəhs edən "Mübariz dastanı" poeması.

Yeni nəşr ulu öndər Heydər Əliyevin müdrik kəlamı ilə açılır: "Şəhidlərin ruhu məni ağrıdır. Həlak olan Azərbaycan vətəndaşlarının surəti hər gün gözümün qarşısına gəlir. Lakin torpağın, vətənin müdafiəsi hər birimiz üçün ən ülvi, ən müqəddəs vəzifədir. Bu müqəddəs vəzifənin yerinə yetirilməsində şəhid olanlar cənnətə gedirlər. Onların qəhrəmanlığı xalqın yaddaşında daim yaşayacaqdır".

Şəhid olaraq cənnətə gedənlərin ümumiləşdirilmiş obrazı "Mübariz dastanı"ndan bütöv, boyaboy keçir. Əlbəttə ki, ön planda qürur, heyranlıq və minnətdarlıq hissidi. Eyni zamanda, poemada yurd, torpaq itkisindən doğan dərin kədər hissi, köçkün, qaçqın həyatının acılarından doğan duyğular da öz poetik təqdimini tapıb. Bütün bu düşüncələr Mübariz İbrahimovun şərəfli şəhid adı fonunda, onun cəsur ruhu ilə həsbi-halda verilir. Əzəldən bu torpağa, bu yurda bağlı olanların havası, ətri bütün poema boyu dönə-dönə gəlib bir daha yaddaşdan keçir. Əhdi, vəfanı əziz tutanların, milli kimliyə tapınanların dastanıdı bu. Adamı səfərbər edir, yönəldir, yurd uğrunda savaşa qoşur və "canımı verərəm bu vətən üçün" deyənlərin dilindən oxunur, Azərbaycan insanını bir səngərdə dayanmağa səsləyir.

"Mübariz dastanı" şəhid ruhu qarşısında oxunan dua, xatirəsi önünə qoyulan çiçək, eyni zamanda, əzəli yurd yerlərimizə qayıdış səslənişi kimidi. Hər misra, həp bənd bir daha bəyan edir ki, yerdə qalmaz bu nahaq qan!

S.Hüseynoğlu

Ədəbiyyat qəzeti.- 2011.- 24 iyun.- S.6.