Abdulla Şaiq qayğıkeşliyi

Abdulla Şaiq görkəmli romantik şair, yazıçı, dramaturq, tənqidçi və ədəbiyyatşünas, müəllim və pedaqoq olmaqla yanaşı, həm də həssas qəlbli, incə duyğulu, qayğıkeş, çarəsizlərə əl tutmağa çalışan insanpərvər bir vətəndaş kimi də diqqəti cəlb edir. "Açıq söz" qəzetinin 1916-cı ilin 30 may tarixli sayında onun dərc etdirdiyi "Açıq məktub" başlıqlı müraciəti dediklərimizi bir daha təsdiq edir.

Açıq məktubdan məlum olur ki, A.Şaiq qonşuluqda ata və anadan yetim qalıb qoca və kasıb nənəsinin himayəsində yaşayan 7-8 yaşlı Ağabacı adlı bir qızın vərəm xəstəliyindən əziyyət çəkdiyini görüb ona öz kömək əlini uzatmış, uyğun xeyriyyə cəmiyyətinə və həkimlərə müraciət etmişdir. Məlum olmuşdur ki, Ağabacıya Bakının havası düşmür. Ona görə başqa yerə köçməlidir. Yoxsulluq və kimsəsizlik isə onların Salyandakı qohumlarıgilə getmələrinə imkan vermir. Ona görə A.Şaiq "Açıq söz" qəzetinin oxucularına müraciət edib onlara xatırladır ki, ömürlərini yaşamış qoca seyidlərə, dilənçilərə həvəslə hər gün yardım üçün nəzir verərkən savab iş tutduqlarını düşünərkən nəzərə alsınlar ki, hələ ömrünün baharını yaşamaqda olan 7-8 yaşlı yetim və xəstə bir qıza əl tutmaq qat-qat savabdır.

Abdulla Şaiqin 130 illik yubileyi günlərində onun insanpərvərliyinin və qayğıkeşliyinin əyani nümunəsi olan "Açıq məktub"unu "Ədəbiyyat qəzeti"nin oxucularına da təqdim etməyi lazım bildim.

Alxan BAYRAMOĞLU

Ədəbiyyat qəzeti.- 2011.- 4 mart.- S.3.