Xalq şairi Rəsul Rzanın ad günündə

"Bu gün Azərbaycan ədəbiyyatının görkəmli nümayəndəsi, xalq şairi, çoxşaxəli yaradıcılığı ilə ədəbi məktəb yaratmış ustad Rəsul Rzanın anadan olduğu gündür. Yenə də dostlar, onun şeirlərini sevənlər, poeziya vurğunları, Rəsul müəllimin xatirəsini əziz tutanlar bir araya gəlib. Əlbəttə, böyük şairin oxucuları milyonlarladı və yəqin ki, o oxucular elə indinin özündə də haradasa öz təkliyinə çəkilib Rəsul Rzanı oxuyurlar. Şairin kitabı haçan oxucu əli ilə açılırsa, həmin şair elə bil yenidən doğulur. Şairlər sevildiyi, oxunduğu vaxtacan yaşayır. Rəsul Rza hər vaxt oxunan və sevilən şairdir. Hər il böyük şairin ad günündə Rəsul Rza mükafatı bir qrup qələm adamına təqdim edilir. Yaxın günlərdə şairin doğulduğu torpaqda - Göyçaydakı ev muzeyində həmin mükafatlar laureatlara təqdim olunacaq". Dünən ustad şairin Fəxri xiyabandakı məzarı önündə anım mərasimini açan xalq şairi, AYB-nin birinci katibi Fikrət Qoca belə dedi.

Sonra tanınmış şair İlyas Tapdıq ustad sənətkara həsr etdiyi şeiri oxudu, vurğuladı ki, Rəsul Rza ədəbiyyatımızda məğrur yaşayan şairdir.

Gənc yazar Şəfəq Sahibli R.Rzaya həsr etdiyi kitabdan şeirlər oxudu.

Xalq şairi, millət vəkili Sabir Rüstəmxanlı vurğuladı ki, bu gün əslində Azərbaycan ədəbiyyatının bayramıdır: "Min beş yüz illik şerimizin ən əzəmətli zirvələrindən birinin doğulduğu gündür. Rəsul Rza mənim ədəbi nəslimin məktəbi olan şairdir. O zaman biz iki məktəb - Səməd Vurğun və Rəsul Rza ədəbi məktəbi aurasında yazıb-yaradırdıq. Tale Rəsul Rzaya imkan verdi ki, bir dövr daxilində iki ömür yaşadı - böyük şeir yolu ilə getdi. Rəsul Rza öz yaradıcılığı ilə Azərbaycan ədəbiyyatının istiqamətlərini müəyyənləşdirdi. O, öz dövrünün əfsanəvi simalarından biri idi - təkcə şeiri ilə yox, işi, əməli, şəxsiyyəti ilə. Rəsul müəllim Azərbaycanın bütün dərdlərini içində yaşadan bir şair idi, gözlərində əbədi bir qəm bulağı çağlayırdı - bu, millətin dərdindən doğan kədər idi. O, Azərbaycan ədəbi düşüncəsində dərin bir iz qoydu.

Müstəqilliyə aparan azadlıq hərəkatımız həm də Rəsul Rza tərbiyəsindən, ədəbi məktəbindən qaynaqlanırdı. Bu cür insanlar olmasaydı, Azərbaycanın keçmişi, indisi və gələcəyi də olmazdı".

Sonda xalq yazıçısı, Yazıçılar Birliyinin sədri Anar ailəsi adından tədbir iştirakçılarına, ustadın dostları və yetirmələrinə təşəkkürünü bildirdi: "Sağ olun ki, həmişə Rəsul Rza adına hörmətlə yanaşırsınız".

Sərvaz

Ədəbiyyat qəzeti.- 2011.- 20 may.- S.2.