"Folklorşünaslıq məsələləri"nin yeni sayı

Bakı Dövlət Universitetinin Elmi Şurasının qərarı ilə nəşr olunan "Folklorşünaslıq məsələləri" jurnalının növbəti sayı oxuculara təqdim edilib. Yeni say professor Azad Nəbiyevin "Mif və mifologiya problemləri" məqaləsilə açılır. Məqalədə Qafqaz xalqlarının mifologiyaları içərisində tarixən özünün əski və mürəkkəb strukturu ilə seçilən Azərbaycan mifologiyasının özəlliklərindən ətraflı söz açılır.

Rafiq Babayevin "Etnokosmik düşüncə: Bəzi məsələlər (Naxçıvan materialları əsasında)", Kamil Hüseynoğlunun "Novruzun tarixi və coğrafiyasına dair", Anar Məmmədovun "Novruz və onun ekoloji aspektləri", Şakir Albalıyevin "İlaxır çərşənbələr", Ülkər Nəbiyevanın "Oğuz eposunda qəhrəmanlıq ənənələri", Könül Həsənovanın "Kitabi-Dədə Qorqud"da adqoyma və andiçmə mərasimləri", Cabbar İşankulun (Özbəkistan) "Dünya və bulmaca" adlı araşdırmaları da jurnalın bu sayında yer alıb.

Kəmalə İslamzadə, Almaz Hüseynova, Ramil Əliyev, Səhər Orucova, Qalib Sayılov və başqalarının folklor yaradıcılığından bəhs edən məqalələri də oxunaqlı materiallardandır.

Ayaz Vəfalının qədim və əziz Novruz bayramının çətin ictimai şəraitlərdə, eləcə də 60-cı illərdə ədəbi həyatımızda, xüsusən “Ədəbiyyat qəzeti” səhifələrində necə ağır və məsuliyyətli məqamlar yaşandığından söz açan "Xalqımızın müstəsna xidməti" məqaləsi, həmçinin Flora Davudqızının "Henrix Fridrix Fon Ditsin Şərq məhəbbəti və türkçülük sevgisi", Nizami Xəlilovun "Şah İsmayıl Xətai yaradıcılığında aşıq şeiri ənənələri", Almara Vəzirqızının "Qarabağ aşıq mühiti - Aşıq Həmid" məqalələri, eləcə də Lətafət Ələkbərova, Leyla Hüseynovanın folklor yaradıcılığı, aşıq sənətilə bağlı araşdırmaları yeni sayda yer alıb.

Toplu həmçinin Molla Qasımın (XIII əsr) şeirlərindən nümunələri, "Yeddi qardaş, bir bacı" nağılının avar variantını L.Hüseynovanın təqdimatında oxuculara çatdırıb.

S.Əsgərli

Ədəbiyyat qəzeti.- 2011.- 4 noyabr.- S.2.