Şairin ev muzeyində

Bu günlərdə xalq şairi Səməd Vurğunun ev muzeyində qüdrətli söz ustasının yaradıcılığını tədqiq və təbliğ edən ədəbiyyat araşdırıcıları bir araya gəldilər. Mərasimi filologiya üzrə fəlsəfə doktoru Aslan Salmansoy açaraq vurğuladı ki, əslində hər bir azərbaycanlının qəlbində öz Vurğunu var, ədəbi mühitə parladığı ilk illərdən yönü bəri Səməd Vurğun irsi, şəxsiyyəti müqəddəs məbədlərimizdən biri kimi tədqiq edilib: "Ədəbiyyatşünas alim Cavanşir Yusifli yaxın günlərdə böyük şairin irsini tədqiq edən tədqiqatçılardan, o cümlədən filologiya üzrə fəlsəfə doktoru Şirindil Alışanlı haqqında söz açarkən doğru qeyd etdi ki, bu insanlar Vurğuna vurğun gözlərlə nəzər salırlar. Eyni fikir bir neçə ay bundan əvvəl ədəbiyyatşünas Qurban Bayramov haqqında da səsləndirilib və bu, çox təbiidir. Səməd Vurğun yaradıcılığı bütün dövrlərdə layiqli tədqiqatçılarını tapıb. Bu ənənə yenə də uğurla davam etdirilir. Vurğunşünas alimlərdən Rəhim Əliyev, Qurban Bayramov, Şirindil Alışanlı, Fəridə Vəlixanlı bu sahədə daha sistemli tədqiqat aparıblar. Bu sıraya gənc ədəbiyyatçıların da qatılması təbiidi. Belə ki, Nəzakət Qafqazlı Aygün, Babulova və Ələmdar Cabbarlının araşdırmaları xüsusi maraq doğurur".

S.Vurğunun ev muzeyinin direktoru Aygün Vəkilova mərasimi davam etdirərək dedi: "Babamın yazı masası önündə fəxr və qürurla deyirəm ki, sizlər də Səməd Vurğunun övladları kimisiniz. Biz eyni mənəvi dəyərlərdən, ruhdan keçib gəlirik və bu mənəvi bağların ən etibarlısından biri də Səməd Vurğun məbədidi…"

Sonra o, böyük şairin adını daşıyan diplomları ədəbiyyatşünas alimlərdən Şirindil Alışanlı, Rəhim Əliyev, Fəridə Vəlixanlı, Nəzakət Qafqazlı, Aygün Babulova, Ələmdar Cabbarlıya və Qazax Xeyriyyə Cəmiyyətinin sədri Vidadi Bayramova, sədr müavini Rövşən Babanlıya təqdim etdi.

Mərasimdə çıxış edənlər milli-mənəvi dəyərlərimizin, S.Vurğun irsinin yaşadılmasında muzeyin gördüyü gərəkli işdən ətraflı söz açdılar, Xavər xanımın, Aybəniz xanımın və Yusif Səmədoğlunun xatirəsini böyük şairin işıqlı ruhuyla baş-başa yad etdilər.

S.Əsgərli

Ədəbiyyat qəzeti.- 2011.- 18 noyabr.- S.2.