İrəvan teatrı Türkiyədə

Mətbuatdan məlum olduğu kimi, ulu öndər Heydər Əliyevin həyatından bəhs edən "Xilaskar" pyesi (Aqşin Babayev) Türkiyə teatrsevərlərinə təqdim olunacaq. Bununla bağlı məlumatı Manisa valisi Xəlil İbrahim Daşöz ilə görüşdə Azərbaycan Mədəniyyət və Həmrəylik dərnəyinin sədri Seyfəddin Ayakyay deyib. S.Ayakyay AzərTAc-a bildirib ki, görüşdə valiyə İrəvan Dövlət Azərbaycan Teatrının noyabrın 14-dən 22-dək Türkiyəyə qastrol səfəri haqqında məlumat verib. Dərnəyin sədri qeyd edib ki, 129 illik zəngin tarixi olan bu sənət məbədinin Türkiyə, o cümlədən Manisa tamaşaçısına göstərəcəyi tamaşalar da qardaş xalqlarımızın ortaq tarixi ilə bağlıdır. Belə ki, ulu öndər Heydər Əliyevin həyatından bəhs edən "Xilaskar" və Çanaqqala döyüşlərində azərbaycalıların qəhrəmanlığına həsr edilmiş türk yazıçısı Zehni Papaqçının əsəri əsasında hazırlanan "Soyqırımı abidəsinin dastanı" tamaşaları teatrsevərlərə təqdim olunacaq. Türkiyənin İstanbul, Ankara, Qars, İqdır şəhərlərində də çıxış edəcək teatr kollektivi zəlzələdən zərər çəkmiş Van şəhərində də teatrsevərlərlə görüşəcək.

Yeri gəlmişkən onu da qeyd edək ki, "Xilaskar" pyesi bundan əvvəl Gürcüstanda və Dağıstanda uğurla tamaşaya qoyulmuşdur.

 

 

Ədəbiyyat qəzeti.- 2011.- 18 noyabr.- S.2.