Naxçıvanda xalq rəssamı Tahir Salahovun xalça üzərində əsərlərindən ibarət sərgi açılıb

      

Noyabrın 19-da Naxçıvan şəhərindəki Heydər Əliyev sarayında Azərbaycanın və Rusiyanın xalq rəssamı Tahir Salahovun xalça üzərində əsərlərindən ibarət sərginin açılışı olmuşdur.

Naxçıvan Muxtar Respublikası Ali Məclisinin sədri Vasif Talıbov dünya şöhrətli rəssam Tahir Salahovun xalça üzərində əksini tapmış əsərlərindən ibarət sərginin açılışı münasibətilə rəssamı və onun timsalında bütün yaradıcı ziyalıları təbrik edərək demişdir:

- Naxçıvanda bu sərginin açılışının keçirilməsi ölkəmizin mədəni həyatında mühüm hadisədir. Ona görə ki, müasir təsviri sənətimizin səviyyəsi xeyli dərəcədə Tahir Salahov kimi qüdrətli sənətkarların yaradıcılığından asılıdır. Bu mənada qətiyyətlə demək mümkündür ki, Tahir Salahov yaradıcılığı milli mədəniyyətimizin inkişafında mühüm rola malikdir. Onun əsərləri mövzujanr zənginliyi, bədii forma rəngarəngliyi və estetik kamilliyi ilə səciyyələnir.

Tahir Salahovu əbəs yerə müasir Azərbaycan təsviri sənətinin patriarxı adlandırmırlar. Görkəmli rəssamın əsərləri Bəhruz Kəngərlidən Səttar Bəhlulzadəyədək şərəfli yol keçmiş Azərbaycan təsviri sənətinin yeni təzahür forması və zirvəsidir.

 

Ali Məclisin sədri demişdir:

- Elə rəsm əsərləri var ki, onlara baxdıqda mütləq köməkçi söz, şərh və ya izahat da tələb olunur. Tahir Salahov yaradıcılığında isə fikir və düşüncənin sözsüz ifadəsi öz əksini tapmışdır. Onun hər bir əsərinin öz mənası və fəlsəfəsi vardır. Qeyd olunanlar bir daha göstərir ki, Tahir Salahov hər şeydən əvvəl, mütəfəkkir sənətkardır.

Qeyd olunmuşdur ki, hörmətli rəssamımızın əsərlərində diqqəti çəkən mühüm cəhətlərdən biri də Vətənə bağlılıq, Vətənə böyük məhəbbətdir. O, hansı mövzuda yaradırsa yaratsın, ilk növbədə milli ovqata köklənmiş sənətkar və azərbaycanlı rəssamdır.

Azərbaycan boyakarlıq sənətinin görkəmli nümayəndəsi olan Tahir Salahov həyatın ritmini tutan, daim müasir olan, zamanın fövqündə dayanmağı bacaran sənətkardır. Onun yaradıcılığında müasirlik qırmızı xətlə ayrılır.

Sənətdə müasirliyin vacib elementlərindən birionun hər dəfə yeni formada, yeni biçimdə təzahür etməsidir. Bu dəfə məşhur rəssamın əsərləri xalçaya köçürülmüş formada təqdim olunur.

 

Ali Məclisin sədri demişdir:

- Naxçıvan Azərbaycan tətbiqi sənətinin mühüm mərkəzlərindən biridir. Xalçaçılıq sənəti bu torpaqda uzun bir yol keçmiş, boyaqçılığın və toxuculuq sənətinin, bunlarla birlikdə yaradıcı düşüncənin üstün cəhətlərini bir-birinə qovuşduraraq dövrümüzə qədər gətirib çıxarmışdır. Düşünürük ki, Tahir Salahovun yeni formada xalça üzərində işlənmiş əsərləri rəssamlığımızla yanaşı, xalçaçılıq sənətimizə də müsbət təsirini göstərəcək, Tahir Salahov yaradıcılığının nəyə qadir olduğunu bir daha bütün əzəməti ilə nümayiş etdirəcəkdir.

Ali Məclisin sədri rəssamı yeni fərdi sərgisi münasibətilə ürəkdən təbrik etmiş, ona yaradıcılıq uğurları, möhkəm cansağlığı arzulamışdır.

Rusiyanın Azərbaycandakı səfiri Vladimir Doroxin böyük rəssam Tahir Salahovun Naxçıvanda xalça üzərində əsərlərindən ibarət sərgisinin açılışının mühüm bir mədəni hadisə olduğunu bildirərək demişdir ki, Azərbaycanın dövlətçilik tarixində mühüm yer tutan, dünyaya Heydər Əliyev kimi böyük şəxsiyyəti bəxş edən Naxçıvanda belə bir tədbirin keçirilməsi həm də muxtar respublikanın müasir inkişaf və tərəqqisinin göstəricisidir. Bu tərəqqi blokada vəziyyətində yaşayan Naxçıvanda aydın görünür. Səfir demişdir ki, dünya mədəniyyətinə nadir sənət inciləri bəxş edən Tahir Salahovun yaradıcılığı və fəaliyyəti həm də Azərbaycan-Rusiya mədəni əlaqələrinin rəmzidir.

Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyinin direktoru, sənətşünaslıq doktoru, professor Röya Tağıyeva görkəmli rəssam Tahir Salahovun yaradıcılığının bütün dünya ictimaiyyəti tərəfindən təqdir edildiyini bildirmişdir.

Xalq Rəssamı Tahir Salahov göstərilən böyük diqqətə, yüksək qonaqpərvərliyə görə minnətdarlığını bildirərək demişdir: Azərbaycan rəssamlığı, boyakarlığı XX əsrin 70-ci illərində böyük dövlət xadimi Heydər Əliyevin ölkə rəhbərliyinə gəlişindən sonra yüksək qayğı ilə əhatə olunmuşdur. Ulu öndərimizin qayğı və himayəsi sayəsində milli mədəniyyətin və təsviri sənətin inkişafında yeni mərhələ başlanmışdır. Görkəmli sənətkar vurğulamışdır ki, Bəhruz Kəngərli tərəfindən əsası qoyulan Naxçıvan rəssamlıq məktəbi də bu gün özünün yeni inkişaf dövrünü yaşayır. Xalq rəssamı Tahir Salahov dünyanın bir çox yerlərində sərgilərinin təşkil olunduğunu bildirmiş, xalça üzərində əsərlərindən ibarət sərginin Naxçıvanda təşkil olunmasının onun üçün böyük dəyərə malik olduğunu vurğulamışdır.

Naxçıvan Muxtar Respublikası Ali Məclisinin sədri Vasif Talıbov, Xalq Rəssamı Tahir Salahov və Rusiyanın Azərbaycandakı səfiri Vladimir Doroxin sərginin açılışını bildirən rəmzi lenti kəsmişlər.

Sonra sərgiyə baxış olmuşdur.

Naxçıvan Muxtar Respublikası Ali Məclisinin sədri Vasif Talıbov və Xalq Rəssamı Tahir Salahov ulu öndər Heydər Əliyevin portretinin əks olunduğu xalçanın önündə xatirə şəkli çəkdirmişlər.

Tahir Salahovun "Qız qalası", "Dədə Qorqud", "Aydan-Şərq ulduzu", "Şərq əfsanəsi-Alagöz", "Atəşgah", "Uçan xalça", "Fikrət Əmirov", "Rostropoviç", "Qara Qarayev", Fikrət Əmirovun "Min bir gecə" baletinə çəkilən dekorasiyalar və digər məşhur əsərlərinin xalça üzərindəki əksi sərgiyə gələnlərə xoş ovqat bəxş etmişdir.

Sənətsevərlər böyük estetik zövqlə işlənmiş əsərlərə maraqla tamaşa etmişlər.

Sonra tədbir iştirakçıları naxçıvanlı rəssamların əsərlərinin nümayiş olunduğu Naxçıvan Dövlət Rəsm Qalereyası ilə də tanış olmuşlar.

Xalq rəssamı Tahir Salahovun xalça üzərində əsərlərindən ibarət sərgi dekabrın 1-dək davam edəcək.

 

 

 Ədəbiyyat qəzeti.- 2011.- 25 noyabr.- S.2.