"Mən XX əsrdə qaldım" poetik məcmuəsinin təqdimatı oldu

Oktyabrın 5-də, Azərbaycan Yazıçılar Birliyində əməkdar incəsənət xadimi, uzun illər "Literaturnı Azərbaycan" jurnalının baş redaktoru işləmiş, "Humay" beynəlxalq mükafatının laureatı, 1999-cu ildə Puşkin yubiley medalı ilə təltif edilmiş şair Mənsur Vəkilovun şeirlərindən ibarət "Mən XX əsrdə qaldım" məcmuəsinin təqdimatı olmuşdur. Kitab "Elm və təhsil" nəşriyyatında işıq üzü görmüşdür.

İstedadlı şairin xatirəsini anmağa tanınmış ədəbiyyat xadimləri, həvəskar şairlər, Mənsur Vəkilov yaradıcılığının pərəstişkarları gəlmişdilər. Onların bəziləri Mənsur Vəkilovu uzun illər tanımış, bir çoxları onunla bir o qədər də sıx ünsiyyətdə olmamışdır. Lakin hamısı şair haqqında xoş xatirələr qoruyub saxlamış, onun yüksək insani keyfiyyətlərini vurğulamışlar.

Tədbirdə Yazıçılar Birliyinin sədri, xalq yazıçısı Anar, Yazıçılar Birliyinin katibi, xalq şairi Fikrət Qoca iştirak etmişdir. Yazıçılar Birliyi sədrinin müavini Nazim İbrahimov tədbiri giriş nitqi ilə açaraq şeirlər toplusunun nəşrini Azərbaycanın rusdilli ədəbiyyatında, bütövlükdə respublikanın mədəni həyatında əhəmiyyətli hadisə adlandırmışdır.

"Mən XX əsrdə qaldım" məcmuəsinin tərtibçi-redaktoru, yazıçı-şairə Nelli Atəşgah, yazıçı-tərcüməçi Enar Hacıyev, şairə Valentina Əfəndiyeva, "Ulduz" jurnalının baş redaktoru Elçin Hüseynbəyli, şairlər Elberd Tuqayev, Paşa Yusifov, Elza Babayeva, Oqtay Rza, yazıçı-fantast Aleksandr Həkimov, bard Sergey Aronoviç və başqaları gözəl lirik poeziya nümunələri yaratmış Mənsur Vəkilovun böyük poetik istedada malik olduğunu vurğulamışlar. O, müxtəlif illərdə nəşr olunmuş 8 şeir toplusunun müəllifidir. Mənsur Vəkilovun ilk şeirlər məcmuəsi hələ 1965-ci ildə çap olunmuşdur. Bu məcmuələrə daxil olan şeirlərin başlıca mövzusu məhəbbətdir. Mənsur Vəkilov üçün məhəbbət çox geniş məfhum olub anaya, Vətənə, qadına, bütün bəşəriyyətə olan sevgi hisslərini əhatə edir. Şairin bəzi sözlərinə gözəl mahnılar bəstələnmişdir.

Uzun illər "Literaturnı Azərbaycan" jurnalının baş redaktoru işləmiş, qələm dostlarının yaradıcılığına həmişə həssas və səmimi bir münasibət bəsləmiş Mənsur Vəkilov Sevinc Heydərova, Alina Talıbova, Marat Şəfiyev və b. kimi tanınmış gənc ədiblərin parlaq pleyadasını yetişdirmişdir.

Tədbirdə müəlliflərin ifasında Mənsur Vəkilova həsr olunmuş şeirlər, habelə şairin öz şeirləri səslənmişdir.

Sonda tədbir iştirakçılarına nəfis tərtibatda çap olunmuş "Mən XX əsrdə qaldım" məcmuəsi paylanmışdır. Kitabın özü kimi, hissələri də şairin şeirlərindən götürülmüş misralarla adlandırılmışdır. "Qayada külüng" adlandırılmış birinci hissəyə Mənsur Vəkilovun müxtəlif illərdə yazdığı 137 şeir daxildir. "Mən hamını sevirdim" adlandırılmış ikinci hissədə şairi yaxından tanıyan insanların xatirələri, habelə ona həsr olunmuş şeirlər yer almışdır.

Ədəbiyyat qəzeti.- 2011.- 7 oktyabr.- S.6.