Dahi şairin yubileyi münasibətilə

Bu günlərdə AYB-nin Gəncə bölməsi Gəncə Zabitlər Evilə birgə "N" hərbi hissəsində dahi Azərbaycan şairi Nizami Gəncəvinin anadan olmasının 870 illiyi münasibətilə görüş keçirmişdir.

Görüşü hərbi hissənin qərargah rəisinin müavini, mayor Elmar Zeynalabdinov açmış, AYB Gəncə bölməsinin sədri, əməkdar incəsənət xadimi, Məmməd Alim tədbirin məqsədini açıqlamış, 870 illik yubileyi yaxınlaşan Nizami Gəncəvinin həyat və yaradıcılığından, yüksək sənətkarlıq xüsusiyyətlərindən danışmış, dahi şairə həsr etdiyi "Sən əvvəl mənimsən…" adlı yeni şeirini oxumuşdur. O, Gəncə şəhər İcra Hakimiyyətinin rəhbərliyi ilə hazırlanan genişmiqyaslı yubiley tədbirləri haqqında məlumat vermiş, görüşdə böyük sənətkarın şeirləri səslənmişdir.

Şairlərdən Aləmzər Əlizadə, Solmaz Şəms çıxışlarında Nizami Gəncəvinin dünya şöhrətli ədəbi irsi ilə bağlı düşüncələrini dilə gətirmiş, öz yeni şeirlərini oxumuşlar.

***

Bölmənin böyük şairin 870 illik yubileyinə həsr etdiyi silsilə görüşlər sırasından növbəti tədbir Gəncə şəhər mərkəzi kitabxanasında keçirilmişdir. Tədbiri ön sözlə açan bölmə sədri, Məmməd Alim dahi Azərbaycan şairi Nizami Gəncəvinin həyatından və dünya şöhrətli sənətindən danışmış, ona həsr etdiyi yeni şeirini oxumuşdur.

Nizami yaradıcılığının tədqiqatçısı Sabir Həsənzadə, yazıçı və şairlərdən Aləmzər Əlizadə, Səadət Ələkbərova, Nadir Ovçu, Solmaz Şəms, Mikayıl Yanar, Oruc Göyçəli, İlyas Nağı, Bəxtiyar Yunisoğlu, Arzu Paşayev çıxışlarında böyük söz ustasının zəngin ədəbi irsinə münasibətlərini bildirmiş, ədəbiyyatımızın, mədəniyyətimizin və mənəviyyatımızın parlaq təcəssümü olan Nizami Gəncəvi ilə fəxr etdiklərini dilə gətirmişlər.

***

Bu sıradan növbəti tədbir Gəncədə dahi şairin adını daşıyan kitabxanada düzənlənmişdir. Tədbiri şəhər mərkəzləşdirilmiş kitabxana sisteminin direktoru, əməkdar mədəniyyət işçisi Elmira Əliyeva açaraq AYB-nin Gəncə bölməsi ilə birgə təşkil edilən silsilə yubiley tədbirlərinin əhəmiyyətindən söz açmış, kitabxanaçılarla yazıçıların sıx əlaqədə çalışdıqlarını vurğulamışdır.

AYB Gəncə bölməsinin sədri, əməkdar incəsənət xadimi, şair Məmməd Alim çıxışında dünya ədəbiyyatına "Xəmsə" kimi əvəzsiz töhfə vermiş dahi Azərbaycan şairi Nizami Gəncəvinin ensiklopedik səciyyə daşıyan yaradıcılığı ilə bağlı fikirlərini oxucularla bölüşmüş, yazıçı və çıxış edənlər Nizami Gəncəvinin Azərbaycan və dünya ədəbiyyatında danılmaz mövqeyindən, hikmətlərlə dolu yaradıcılıq aləmindən, onun ədəbi irsindən gətirdikləri konkret nümunələrlə söz açmışlar.

S.Əsgərli

Ədəbiyyat qəzeti.- 2011.- 7 oktyabr.- S.4.