Ah, necə də gözəldi iki zərif kəpənək,

Çiçəklərin üstünə qonan zaman sevincək…

Ah, necə də gözəldi, quşlar düşüb həvəsə,

Söyüdün budağında verən zaman səs-səsə…

Baxıram uzaqlara - qəm sayrışır gözümdə,

Hamı cütdü, təkcə mən tənhayam yer üzündə…

***

Ay qoca, nəyə görə götürmüsən bu yükü? -

Qoy sənə kömək edim, cavan işidir bu ki!..

Uca, şux qamətimə, güclü qollarıma bax,

Qətiyyən çətin deyil mənimçün yük daşımaq.

Qəribliyə salma gəl söylədiyim bu sözü -

Səninçün yük deyilmi elə qocalıq özü?

***

Dağlarda yaşayıram, ay dost, nə vaxtdan bəri,

Mənə ətdən dadlıdı çölün otu, pencəri.

Qamışdan tikdiyim dam səliqəli, təmizdi,

İlbizə çanağı tək o da mənə əzizdi.

Hər şey gözəldi, ancaq bir ah qopur sinəmdən,

Sevdiyim uzaqdadı, tənha darıxıram mən…

***

Ay yağış, hey yağırsan, payız olsun, ya bahar,

Görəsən doğrudanmı səndən qorunmaq olar?

Plaşım otlardandı, şlyapamsa samandan,

Axı hədəf seçmisən sən məni nə zamandan?

Paltarımı soyunub atdım bir tərəfə mən, -

Daha səndən qorxmuram, yağ nə

qədər istəsən!..

***

Toxundum komunqonun* bir mürgülü siminə,

Ürəyim sakit oldu, düşdüm eşq tilsiminə.

Başqa telə toxundum, o hönkürdü, ağladı

Sevdalı ürəyimdə dərd sel kimi çağladı.

Necə itsin qəm, kədər? - Soruşdum ki, özümdən -

Bu qədər ki, ayrılıq vardır bu yer üzündə?!

***

Sakit suyun üzündə titrəyən kölgəyə bax,

Körpünün üstü ilə gedir bir qoca monax.

Ay qoca, bu dünyanı gəzib dolanmısan sən,

Bu ixtiyar çağında hara belə gedirsən?

Gərək siz görəydiniz o nurani simanı,

Sakit göstərən zaman mənə sonsuz səmanı!

Tənha durna

Tənha durna görəndə yerdə yanan işığı,

Qanadlarını yığıb tez şığıdı aşağı.

İstədi ki, insanlar görsün necə yaşayır,

Baxın, o yer üzündə bir qəribə oxşayır.

Lələyini yolanda o, gen qaça bilmədi,

Bir daha qanad açıb göyə uça bilmədi…

***

Qanadları yolunmuş durna olsaydım əgər,

Çalışardım günlərim ötüb keçməsin hədər.

Heç vaxt ruhdan düşməzdim, ağrılara dözərdim,

Yaydan qopan ox kimi səmalarda süzərdim.

Uçuşan buludlara yenə sinə gərərdim,

O mavi, o lacivərd səmaları görərdim…

***

Kimsəsiz bir sahildə mən səni səsləyirəm,

Niyə gəlmirsən, niyə? - Yolunu gözləyirəm.

Para aya baxanda gözümdə şimşək çaxır,

Mən səni gözləyirəm, niyə gəlmirsən axı?

Danlayıram özümü, yaş göynədir gözümü,

Doğrudanmı bir daha görməyəcəm üzünü?!

***

Bir vaxt uça bilirdim tez-tez qanad çalaraq,

Göylərdə süzə-süzə xəyallara dalaraq,

Qəlbimdə ümid, işıq enirdim bir zirvəyə,

Sənin gözəl üzünü bəlkə də gördüm deyə…

Bir də ora uçmaram dalıb şirin xəyala,

Çünki qorxuram arzum mənim gözümdə qala…

Çon Çxol

* Altı simli musiqi aləti

Tərcümə edəni: Rafiq Yusifoğlu

Ədəbiyyat qəzeti.- 2011.- 9 sentyabr.- S.5.