Hikmət Mahmud - 75

Hörmətli Hikmət müəllim!

Sizi - istedadlı şairi, tanınmış alimi 75 illik yubileyiniz münasibətilə təbrik edirik.

Siz 1936-cı ildə İsmayıllı rayonunun Mican kəndində anadan olmusunuz. 1956-cı ildə doğma rayonunuzda orta məktəbi bitirdikdən sonra Azərbaycan Dövlət Universitetinin fizika, sonra isə geologiya-coğrafiya fakültəsində təhsil almısınız. 1963-1964-cü illərdə Qazaxıstanın Aktyubinsk vilayətinin Muqodjar geoloji partiyasında texnik-geoloq, 1964-1965-ci illərdə isə Mərkəzi geoloji-axtarış partiyasında geoloq, az sonra rəis vəzifələrində çalışmısınız. Elmə olan marağınız 1967-ci ildə sizi AMEA-nın Geologiya İnstitutunun aspiranturasına gətirib. 1969-cu ildən həmin institutda elmi işçi kimi çalışmağa başlamış, 1971-ci ildə namizədlik, 1992-ci ildə doktorluq işi müdafiə etmisiniz. Siz respublikamızda aşkar edilən perlit yataqlarının geokimyəvi xüsusiyyətlərini ilk öyrənən və onları hərtərəfli tədqiq edən tanınmış mütəxəsissiniz. Bir çox beynəlxalq və respublika səviyyəli simpozium və konfranslarda Azərbaycan geologiya elmini layiqincə təmsil etmisiniz.

Siz bədii yaradıcılığa tələbəlik illərindən başlamısınız. "Geoloq" adlı ilk şeriniz 1967-ci ildə "Azərbaycan gəncləri" qəzetində çap edilib. Sonrakı illərdə "Azərbaycan vulkan şüşələri", "Qeyri-filiz faydalı qazıntıları və onların tətbiqi", "Faydalı qazıntılar və onların tətbiqi", "Təbii ehtiyatların istifadəsi və təsnifatı" və s. kimi elmi əsərlərinizlə yanaşı, "Çiçəklərin intizarı", "Danışanda, güləndə", "Qocalmağa tələsmə", "Könül açaq, söz deyək", "Qıyma gözəlliyinə", "Dünya, sənin nəyin yoxdur" və başqa poeziya kitablarınız işıq üzü görüb. Ömür yolunuzdan bəhs edən "Hikmət Mahmudov: Biblioqrafiya" kitabı "Azərbaycanın elm və mədəniyyət xadimləri" seriyasından çap edilib.

Hörmətli Hikmət müəllim!

Sizi bir daha 75 illik yubileyiniz münasibətilə təbrik edir, sizə uzun ömür, cansağlığı, yaradıcılığınızda uğurlar arzulayırıq.

Azərbaycan Yazıçılar Birliyi

Ədəbiyyat qəzeti.- 2011.- 23 sentyabr.- S.5.