Demirəm ki, dağ yaratdım

Yaz havası sərin olur,

İlk məhəbbət şirin olur.

Ağıl dərin, dil şirinsə,

Ürəklərdə yerin olur.

Söz yurdunda at oynatdım,

Demirəm ki, dağ yaratdım.

Söz bostanı bitirib mən,

Kal başlara dəymiş satdım.

Doğru sözə yoxdu zaval,

Doğru danış, eldə ucal.

Baxma əsən hər küləyə,

Lap salsa da min qalmaqal.

Gəda, nadan ucalmasın,

Kədər qəlbə yol almasın.

Göydə bulud qaralsa da,

İnsan qəlbi qaralmasın.

Hikmət Mahmud, aç qəlbini,

Tök ortaya söz təbini.

Qanmazlarla nə işin var,

Qanana de mətləbini.

Döyür qapımı qocalıq

Baş ağarıb, diş tökülüb,

Güc azalıb, bel bükülüb,

Təbəssüm uzaq çəkilib -

Döyür qapımı qocalıq.

Gözlər qalıb görməyindən,

Tor asılıb eynəyimdən.

Canım düşüb öz heyindən -

Döyür qapımı qocalıq.

Dil titrəyir, əllər əsir,

Baş-bədəndə yüz kəm-kəsir.

Canım dərmana müntəzir -

Döyür qapımı qocalıq.

Yorğan-döşəyə düşmə gəl,

Yoxsa işin olar əngəl.

Gedəsiyik axır-əvvəl,

Döyür qapımı qocalıq.

Övlad yaxşı övlad ola,

Qocalıqda qeydə qala.

Düşürəm gündə min hala -

Döyür qapımı qocalıq.

Vəzifəylə cah-cəlalın

Varsa əgər xoşdur halın.

Dəyişibdir hal-əhvalım,

Döyür qapımı qocalıq.

Gərəkdir

Allahın nəzəri üstündə olsa,

Küllü-aləm gələ, sənə batanmaz.

İxtiyar müdrikə, aqilə qalsa,

Hər yan behişt olar, dünya güllü yaz.

Kaş iblis xislətdə heç kəs olmaya,

Peyğəmbər övladı tuta hər yanı.

Ola hər insanın üzündə həya,

Təzə donda görək qoca dünyanı.

İnsan gözdən düşər, söz qiymətindən,

Ağıl dil üstündə hakim olmasa.

Yapış qocaların tut ki, əlindən,

Bir gün səninlə də dost olar əsa.

Ağsaqqal - böyük söz, böyük kəlamdır,

Bu ada hər yerdə hörmət gərəkdir.

Ağsaqqal-ağbirçək qoşa qanaddır,

Bunu anlamayan nadan deməkdir.

Öz yerini bil

Kəsmə budağı,

Yaşıllıq solar.

Qoru bulağı,

Susuzluq olar.

Qapın açıqsa

Qonağın gələr.

Ev natəmizsə

El sənə gülər.

Elin-obanın

Qayğısına qal,

Ata-anadan

Xeyir-dua al.

Tanrıya sığın,

Elə arxalan.

Ağır otur-dur,

Yaxşı ad qazan.

Müdrikdən öyrən,

Aqilə bənzə.

Öz yerini bil,

Çox girmə gözə.

Hikmət Mahmud

Ədəbiyyat qəzeti.- 2011.- 23 sentyabr.- S.5.