Yurd həsrətli şeirlər

Zakir Ağdamlı: "İlahi, dağlara

qovuşdur məni". Bakı - 2011

Bədnam erməni cəlladlarının fitnə-fəsadı ucbatından doğma yurd-yuvasından didərgin düşmüş Zakir Ağdamlının "İlahi, dağlara qovuşdur məni" diləyi ilə eyniadlı kitab araya-ərsəyə gətirməsi təbiidi. Onun sözügedən kitaba daxil etdiyi "Dağlara" şerindən yadımızda qalan "O dağdan yol alıb, bu dağa çıxam, xərclənə yollarda pulum dağlara" istəyinin səmimiyyəti də təbiilikdən qaynaqlanır.

Tanınmış şairlərdən Eldar İsmayılın ön sözü və Musa Ələkbərlinin redaktorluğu ilə işıq üzü görən yeni nəşrə Z.Ağdamlının son illərdə yazdığı şeirlər daxil edilib.

Zakirin şeirlərindən yurd həsrəti, vətənə məhəbbət, dövlətçiliyə sədaqət hissi sıx-sıx keçir. O, sevdiyi insana xitabən "Baxmaq istəyirəm həyata ancaq sənin gözlərinin pəncərəsindən" - yazanda da oxucu üçün səmimi, həssas bir qələm adamı olaraq qalır: "Elə alışam ki, Ağdamda gərək, bəlkə gərək oldu külüm dağlara" - deyəndə də...

Bu misraları oxuduqca illər öncəsi Z.Ağdamlının şeirləri haqqında səmimiyyətlə söz açan unudulmaz xalq şairimiz Məmməd Arazın münasibəti yaddaşımda canlanır: "Zakir Ağdamlı həkimdir. Həkim sənəti insana poeziya sənəti qədər yaxındır... Həkim də insan qəlbinə "boylanır", şair də! Poetik söz dərman olur, qeyri-poetik həkim məsləhəti də. Zakir Ağdamlının, necə deyərlər, avazı xoşuma gəlir".

Elə bizi də kitab boyu çəkib aparan o xoş avazın havasıdı...

Sərvaz

Ədəbiyyat qəzeti.- 2012.- 7 dekabr.- S.7.