Yusif Həsənbəy - 80

Hörmətli Yusif müəllim!

Sizi - tanınmış şairimizi 80 yaşınızın tamam olması münasibətilə təbrik edirik.

Yarım əsrdir ki, siz söz-sənət meydanında yorulmadan yazıb-yaradırsınız. Bu müddət ərzində iyirmidən artıq şeir toplunuz işıq üzü görmüşdür. "Ördəyin balası", "Yağışda çimən cücə", "Çay dənizə tələsir", "Qağayı", "Unutmaram o günləri", "İnsan ömrü", "Evin ulduzu", "Məhəbbətli dünyamız", "Xəcalətli qalmayaq", "Çəmən gülləri", "İşığın istisi" və s. kitablarınıza daxil olan şeir və poemalarınız ədəbi ictimaiyyət tərəfindən maraqla qarşılanmışdır. Əsərlərinizin mövzusu rəngarəngdir: patriotik şeirlər yazırsınız. Lirikaya müraciət edirsiniz, ümumbəşəri problemlər sizi narahat edir, balalarımıza da şeir hədiyyə edirsiniz. Bütün bu əlvanlığı birləşdirən bir keyfiyyət var: bu, bütün yaradıcılığınıza hakim olan səmimiyyətdir. Şeirlərinizə 300-ə yaxın mahnının bəstələnməsi də poetik parçalarınızın təbii, ürəyəyatımlı olmasıdır.

Dramaturgiyada da qələminizi sınamısınız. "Yıxılanı qaldırın", "Sehrli üzük", "Ayı kürkü", "Dağlarda işıq" pyesləriniz teatrlarda və televiziyada səhnələşdirilmişdir.

Nəsrdə də qələminizi sınamısınız. "Sualtı döyüşlər" romanınızı nəşr etdirib oxuculara təqdim etmisiniz. Əsər gərgin axtarışlarınızın bəhrəsidir. İlk baxışda adi görünən hadisələr bədii lövhələrlə əks olunur. "Next-özgə millət" romanı, "Sarı Çalı", "Onu çağırırdılar", "Buzqıran yol açır", "Təkan" povestləri diqqətlə qarşılanmışdır.

Çoxşaxəli yaradıcılığınızda bədii tərcüməyə də yer ayırmısınız. Şillerin, B.Brextin, N.Hikmətin, P.Nerudanın və b. əsərlərini dilimizə çevirmisiniz. Sizin yaradıcılığınızdan nümunələr bir neçə xarici dilə çevrilmiş, "Çay dənizə tələsir", "Dəyirman", "Mahnılar üçün quş yuvaları" kitablarınız Moskvada çapdan çıxmışdır.

1952-56-cı illərdə indiki Azərbaycan Dövlət Pedaqoji Universitetində təhsil almısınız. Moskvada Ali Ədəbiyyat kurslarında oxumusunuz. Əmək fəaliyyətinə Bakıda, rayon komsomol komitəsində təlimatçı kimi başlamısınız. Sonralar Azərbaycan Dövlət Musiqi Nəşriyyatında redaktor, "Bakı" qəzetinin redaksiyasında tərcüməçi işləmisiniz. Hazırda "Azərbaycan" jurnalının şöbə redaktorusunuz. Ədəbiyyatımız sahəsindəki xidmətlərinizə görə əməkdar incəsənət xadimi fəxri adına layiq görülmüsünüz.

Hörmətli Yusif müəllim!

Sizi bir daha yubileyiniz münasibətilə təbrik edir, sizə uzun ömür, cansağlığı, yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2012.- 21 dekabr.- S.7.