Zeyqəm Vüqar - 60

Hörmətli Zeyqəm Vüqar!

Sizi- istedadlı şairimizi 60 yaşınızın tamam olması münasibətilə təbrik edirik.

Siz bədii yaradıcılığa ötən əsrin 70-ci illərindən başlamısınız. İlk şeirlərinizi tələbəlik illərində yazmısınız. 40 ilə yaxındır ki, şeirləriniz müxtəlif mətbu orqanlarda çap olunur. Bu illər ərzində "Öyrət məni ayrılığa", "Sevgim gərəyin olar", "Vətən dərdi olmaya", "Məhəbbətin bəsimdi" şeirlər kitabınız işıq üzü görüb. "Qoy tanısın dünya səni", "Araz-2", "Araz-3", "Şəhidlik - ömrün nur çağı", "Çinar pöhrələri", "Səhər nəğmələri", "Dostlar töhfəsi" və s. almanaxlarda onlarla şeirləriniz çap olunub.

Siz 1975-ci ildə Naxçıvan Dövlət Universitetinin Azərbaycan dili və ədəbiyyatı fakültəsini bitirmisiniz. 1975-1981-ci illərdə doğulduğunuz kənddə - Şahbuz rayonunun Külüs kəndində müəllim işləmisiniz. Sonra isə 6 il Babək rayon Tarix-diyarşünaslıq muzeyində fond müdiri, 1987-1990-cı illərdə Babək rayonundakı Nehrəm kənd 2 nömrəli orta məktəbində müəllim, 1990-1994-cü illərdə Babək rayon Təhsil şöbəsində metodist vəzifəsində çalışmısınız. 1995-ci ildən bu günə kimi yaşadığınız Qoşadizə (Babək rayonu) kənd orta məktəbinin direktoru vəzifəsində çalışırsınız.

Siz uzun illərdir ki, radio və televiziyada çıxışlar edir, pedaqoji sahəyə aid verilişlər hazırlayırsınız.

Hörmətli Zeyqəm müəllim!

Sizi bir daha 60 illik yubileyiniz münasibətilə təbrik edir, sizə uzun ömür, cansağlığı, yaradıcılıq uğurları arzulayırıq.

Azərbaycan Yazıçılar Birliyi

Naxçıvan MR Yazıçılar Birliyi

Ədəbiyyat qəzeti.- 2012.- 28 dekabr.- S.6.