Qış oğlan çağında yaz geyinibdir

Qırmızı qar düşdü ki,

Çəmənə, bağ-bağçaya -

Qızıl gülün kolları

Oxşayır al boğçaya.

Qəlbi od yaxır sanki,

İldırım çaxır sanki;

Çiçəklər axır sanki, -

Çevrilibdir bağ çaya.

Ömrə gülü bu cür ək,

Qönçəni ruhuna çək;

Əmr edir gözə ürək:

"Ətir axır, bax, çaya!"

Haqqın əli düz əldir,

Görən, quran göz, əldir, -

Cənnət, huri gözəldir,

Qar qızla bu bağça ya?!

…Özümdə deyil

Həm varam mən, həm yoxam, -

Əksim üzümdə deyil.

Ac-yalavac bir toxam, -

Dünya gözümdə deyil.

Yaş alovam, quru su;

Suyum quru, qurum su.

Ömrün yaşı, qurusu

Eyni düzümdə deyil.

Dağım asılıb tükdən,

Xırdam iri böyükdən,

Belim bükülür yükdən, -

Gücüm dizimdə deyil.

Yolumda qurd ulayıb,

Məni həyat talayıb;

Tənhalığa calayıb, -

Qəlbim özümdə deyil.

Çətin, asan…

Yük götürməyə nə var,

Onu daşımaq - çətin.

Ömür sürməyə nə var,

Onu yaşamaq - çətin.

Dağa dırmanmaq - asan,

Ucala bilmək çətin.

Gücünü verdiyindən

Güc ala bilmək çətin.

Gənclik itirmək - asan,

Qocala bilmək çətin.

Ömrü uzatmaq üçün,

Sürünmək çox asandır;

Şitə duz atmaq üçün

Dümdüz dayanmaq - çətin.

Yuxu həbi atanla

Yatıb-oyanmaq çətin.

Düzdə, hətta enişdə də

Dirənirik gah yoxuşa, gah dikə;

Nəhəng ikən tikə-tikə

Ölməkdən çətini yox.

Böyüş Yaquboğlu

Ədəbiyyat qəzeti.- 2012.- 28 dekabr.- S.7.