"Qarabağ hekayələri" audio-kitabda

Yazıçı-publisist Günel Anarqızının sayca ikinci audio-kitabı olan "Qarabağ hekayələri"nin dekabrın 24-də Azərbaycan Yazıçılar Birliyinin Natəvan klubunda təqdimatı keçirildi. İki dildə hazırlanan audio-kitaba yazıçının "Ataya", "Şuşam", "Ağac", "Qadın üzlü şəhər", "Arzu" və "Keçmişə sarı" hekayələri daxildir. Xalq artistləri Şükufə Yusupova, Fəxrəddin Manafov, Yalçın Adıgözəlov, əməkdar artist Mehriban Zəki, aparıcılar Nərgiz Cəlilova və Emin Musəvinin səsləndirdiyi hekayələr toplusunda əməkdar artist Emil Əfrasiyab və pianoçu Nizami Əliyevin bəstə və ifaları yer alıb.

Tədbiri giriş sözü ilə açan AYB-nin katibi Rəşad Məcid Günel Anarqızının yaradıcılığı haqqında məlumat verdi: "Günelin "Oğlun Qarabağ" adlı ilk kitabına yazdığı ön sözdə Anar müəllim Günelin yaradıcılığa başlaması ilə bağlı həm qürur, həm də məsuliyyət hissi keçirdiyini demişdi. Qarabağla bağlı hekayələri barədə fikrini bildirən Anar müəllim uzun illər yay istirahətini Şuşada keçirdiklərini, Günelin hekayələrindəki Şuşa haqqında təfərrüatların məhz həmin illərdə yarandığını söyləmişdi. Günelin Şuşa ilə bağlı genetik yaddaşı var. Anar 80-ci illərdə Şuşa haqqında "Özüm də bilmirəm Şuşanı niyə bu qədər çox sevirəm" yazmışdır. 1950-ci illərdə Rəsul Rza "Arzular dəftəri" yazısında Şuşa haqqında yazırdı. Şuşa ilə bağlı bu nisgilli yazıların əhval-ruhiyyəsi Günelin hekayələrinə hopub. Günel müasir dövrün tələb və istəklərini nəzərə alaraq belə bir audio-kitabı gerçəkləşdirib. Bu layihəyə dəstək "Bank Standard" tərəfindən verilib. Hekayələrin təhkiyəsində emosionallıq çox mühüm hadisədir. Arzu edirəm ki, gələcəkdə Şuşa haqqında yazılarınız ağrılı, iztirablı, nisgilli olmasın".

Xalq yazıçısı, AYB-nin katibi Çingiz Abdullayev "Günelin "Qarabağ hekayələri" audio-kitabının həm azərbaycanca, həm də rus dilində işıq üzü görməsini Azərbaycan ədəbiyyatının, mədəniyyətinin uğuru kimi dəyərləndirdi: "Mən əslən qarabağlıyam. Günelin hekayələrində Qarabağ ruhu duyulur. Təbii ki, biz XXI əsrdə yeni-yeni texnologiyalara keçirik. Gənc nəsil üçün belə audio-kitablar, internetdə mütaliə çox vacibdir".

Xalq şairi, AYB-nin birinci katibi Fikrət Qoca Güneli yeni audio-kitabının çıxması münasibətilə təbrik etdi: "Günelin yazıları nəsrlə poeziyanın sintezidir. O, yazılarında öz ürəyini qoyub. Onun hekayələrində Şuşa yaşayır".

AYB-nin sədr müavini Nazim İbrahimov audio-kitabla bağlı fikirlərini tədbir iştirakçıları ilə bölüşdü: "Günel "Qarabağ hekayələri"ndə xalqının ağrısını görüb, hiss edib, o, hamını Qarabağı unutmamağa, onu qaytarmağa çağırıb".

Ədəbiyyatşünas alim, AYB-nin katibi Arif Əmrahoğlu çıxışında Günel Anarqızının böyüyüb boya-başa çatdığı mühitin onun yaradıcılığına təsir etdiyini dedi: "Günelin böyüdüyü ocaq "yaddaş" ocağıdır. O, Azərbaycan, Qarabağ nisgili ilə böyüyüb. Biz Cəlil Məmmədquluzadəni düşünəndə yadımıza acı gülüş düşür, Sabiri düşünəndə satira yada düşür, Rəsul Rzanı düşünəndə ilk olaraq yadımıza "Rənglər" düşür. Günel xanımı səciyyələndirən isə onun redaktoru olduğu "Pəncərə" jurnalıdır. Günel "Pəncərə" jurnalı ilə gözəlliyə, zərifliyə, həzinliyə pəncərə açdı. Günel dərdi, ağrını görür, oxucuya göstərir. Mən onun yazılarında yaddaşımızı hərəkətə gətirən ağrı gördüm".

Yazıçının anası, AMEA-nın müxbir üzvü Zemfira Səfərova Günelin uşaqlıq illərində Şuşada keçirdikləri günləri xatırladı, onun bu kitabla öz vətəndaşlıq borcunu yerinə yetirdiyini vurğuladı və gələcəkdə belə əsərlərin Qarabağda, Şuşada işıq üzü görməsini arzuladı.

Təqdimat mərasimində Elçin Hüseynbəyli, Bəhram Bağırzadə, Fəxrəddin Manafov, Yalçın Adıgözəlov, Mehriban Zəki, Nərgiz Cəlilova, Emin Musəvi, Nizami Əliyev, Lalə Cəbrayılova çıxış edərək təqdim olunan audio-kitabın məziyyətlərindən söz açdılar.

Xalq yazıçısı, AYB-nin sədri Anar çıxışında Günelin istedadlı yazıçı olduğunu, onun yaradıcılıq potensialına inandığını söylədi: "Mən birinci dəfə Şuşaya 14 yaşında, Günel isə 9 yaşında gedib. Günelin istedadından başqa, yaddaşı da məni təəccübləndirir. Onun gördüyünü, müşahidə etdiyini yadında saxlamağı təqdirəlayiqdir. Günel yeni texnologiyalar əsrinin yazıçısıdır. Onun əsərlərini internetdə oxuyan ermənilər də ona kəskin cavablar yazırlar. Bu da "Qarabağ hekayələri"nin rezonans doğurduğunu göstərir".

Təqdimat mərasiminin sonunda çıxış edən Günel Anarqızı iştirakçılara, çıxış edənlərə, layihənin həyata keçməsinə köməklik göstərən "Bank Standard"ın rəhbərliyinə öz təşəkkürünü bildirdi: "Qarabağ hekayələri" audio-kitabındakı hekayələr 2002-2006-cı illərdə qələmə alınıb. Bəziləri avtobioqrafik nüansları əks etdirir, bəziləri təxəyyülün məhsuludur. Bu kitab mənim Qarabağ nisgilimin təxəyyülüdür. Mən səmimi deyirəm ki, istərdim bu layihə olmayaydı, amma Şuşa indi özümüzdə olaydı".

Sərvaz

Ədəbiyyat qəzeti.- 2012.- 28 dekabr.- S.5.