Şirindil Alışanlı - 60

Hörmətli Şirindil müəllim!

Sizi - istedadlı tənqidçi-ədəbiyyatşünası anadan olmanızın 60 illiyi münasibətilə təbrik edirik.

Siz ədəbi fəaliyyətə ötən əsrin yetmişinci illərində başlamısınız. İlk məqalələriniz prinsipiallığı, cəsarəti, elmi-nəzəri səviyyəsi ilə ədəbi ictimaiyyətin diqqətini cəlb etmişdir. 1977-ci ildə poeziyaya həsr edilmiş respublika müşavirəsindəki məruzəniz geniş əks-səda doğurdu. Siz "Ədəbi proses" silsiləsindən buraxılan kitabların əsas müəlliflərindən biri kimi poeziyamızın inkişaf istiqamətlərini ardıcıl tədqiq edirsiniz.

1975-ci ildə BDU-nun filologiya fakültəsini bitirmisiniz. M.Qorki adına Dünya Ədəbiyyatı İnstitutunda təhsilinizi davam etdirdiyiniz illər sizin bir ədəbiyyat nəzəriyyəçisi kimi formalaşmağınızda müstəsna rol oynadı. Məşhur rus alimi Yuri Borevin rəhbərliyi ilə romantizm problemlərinə həsr etdiyiniz monoqrafiya bu gün də öz aktuallığını saxlamışdır. Ədəbi-tənqidi, nəzəri-metodoloji problemləri, müasir poeziya, onun əsas inkişaf meylləri mövzusunda məqalələriniz maraqla qarşılanmışdır.

Siz uzun illərdir Nizami adına Ədəbiyyat İnstitutunda çalışırsınız. İnstitutun elmi katibi, bölmə müdiri, hazırda isə şöbə müdiri kimi ədəbiyyatşünaslığımızın inkişafı və kadr hazırlığında əlinizdən gələni əsirgəmirsiniz. Sizin rəhbərliyinizlə hazırlanmış "Azərbaycan ədəbiyyatının tarixi poetikası" mövzusunda iki kitab bizim ədəbi-nəzəri fikirdə yeni istiqamətdir. "Sözün estetik yaddaşı", "Romantizm: mübahisələr, həqiqətlər", "Ədəbi-bədii düşüncənin sərhədləri", "Müasir humanitar təfəkkür və Azərbaycan ədəbiyyatşünaslığı", "Yaradıcı təfəkkür: tarixilik və müasirlik" monoqrafiyalarınız elmi ictimaiyyət tərəfindən yüksək qiymətləndirilmişdir. Siz filologiya elmləri doktorusunuz.

Uzun illərdir ədəbi-elmi yaradıcılıqla yanaşı milli-mənəvi irsimizin nəşri və təbliği sahəsində iş görürsünüz. "Sabah" nəşriyyatının redaktoru və təsisçisi, "Elm" qəzetinin baş redaktoru (1993-1998-ci illər) kimi fəaliyyət göstərdiyiniz illərdə klassik və müasir ədəbiyyatımızın, tarixi və dini mənbələrimizin onlarca nümunəsini nəşr etmisiniz.

1997-ci ildən "Elm" Redaksiya, Nəşriyyat və Poliqrafiya Mərkəzinə rəhbərlik edirsiniz. Bir sıra mötəbər nəşrlərin redaksiya şuralarının məsul katibi, redaksiya heyətinin üzvüsünüz. Sizin redaktorluğunuzla onlarca sanballı kitab çap edilmişdir. Xüsusən, xalqımızın tarixi, ədəbiyyatı, fəlsəfi fikri ilə bağlı çoxcildliklərin nəşri sahəsində əməyiniz təqdirəlayiqdir. Siz həmçinin "Ədəbiyyat qəzeti"nin redaksiya heyətinin üzvüsünüz.

Hörmətli Şirindil müəllim!

Sizi bir daha yubileyiniz münasibətilə təbrik edir, cansağlığı, uzun ömür, yaradıcılıq uğurları arzulayırıq.

Azərbaycan Yazıçılar Birliyi

"Ədəbiyyat qəzeti"nin redaksiya heyəti səmimi qəlbdən bu təbrikə qoşulur

Ədəbiyyat qəzeti.- 2012.- 2 noyabr.- S.7.