Şeirlər və poemalar

Xalq şairi Sabir Rüstəmxanlının "Əbədi sevda" şeirlər və poemalardan ibarət kitabı bu günlərdə "Təhsil" nəşriyyatı tərəfindən nəfis tərtibatla çap olunmuşdur. Nəşriyyatın təqdimində deyilir: Sabir Rüstəmxanlı son qırx ildə Azərbaycanın ədəbi-mədəni, ictimai-siyasi həyatında dərin və silinməz izlər buraxmış, sevilən, tanınan ədəbi şəxsiyyətlərdən biridir. Onun hər şairə qismət olmayan belə bir ümumxalq məhəbbəti qazanmasının əsas səbəbi ədəbi yaradıcılığındakı yüksək vətənpərvərlik və mübarizə eşqiylə yanaşı, həm də ictimai-siyasi fəaliyyəti - 1988-ci ildən başlanan milli-azadlıq hərəkatının əsas liderlərindən biri olması ilə bağlıdır. O, Azərbaycanın Dövlət müstəqilliyinin bərpası haqqında Konstitusiya aktının təşəbbüskarlarından və onu Parlamentdə qəbul etdirən azsaylı millət vəkillərindən biridir. 1989-cu ildə Azərbaycanda ilk müstəqil və demokratik mətbuat nümunəsi olan "Azərbaycan" qəzetini təsis etmiş və iki il onun baş redaktoru olmuşdur… 1991-1995-ci illərdə Azərbaycanın mətbuat və informasiya naziri vəzifəsində çalışarkən təkcə ölkəmizdə deyil, bölgədə demokratik mətbuatın inkişafı, söz azadlığının bərqərar olması yolunda böyük xidmət göstərmişdir… Dünya azərbaycanlılarının hüquqlarını qorumaq sahəsindəki fəaliyyəti, sülh, ədalət, insan haqları uğrunda yorulmaz mübarizəsi onu beynəlxalq aləmdə də yaxşı tanıdır.

S.Rüstəmxanlı Azərbaycanın milli şairi olmaqla yanaşı, həm də görkəmli ədəbiyyatşünas-alim, nasir, dramaturq və tərcüməçidir.

Publisistikamızın ən ciddi uğurlarından olan "Ömür kitabı" hər bir ailədə stolüstü kitab olmuş, M.F.Axundzadə adına ədəbi mükafata layiq görülmüşdür.

"Göy Tanrı", "Ölüm zirvəsi", "Difai fədailəri", "Xətai yurdu", "Sunnami" romanları tarixə və çağımızın hadisələrinə yeni yanaşma tərzi və yüksək bədii-estetik dəyəri ilə onu həm də nasir kimi sevdirmişdir…

Azərbaycanda iyirmi, Türkiyədə, Rusiyada İranda, Özbəkistanda, İsveçdə isə, üst-üstə, on beşdən artıq kitabı nəşr edilmişdir. 2005-ci ildə ona Azərbaycanın xalq şairi adı verilmişdir… Polşa Respublikasının Mədəniyyət Nazirliyi mədəniyyət sahəsindəki xidmətlərinə görə onu "Sənətkara şöhrət" medalı ilə təltif etmişdir…

Yeni kitabında bölünmüş və 35 milyonu hələ də İran rejiminin əlinin altında inləyən, ərazisinin iyirmi faizi Ermənistan tərəfindən işğal edilmiş Azərbaycan xalqının faciələri əsas mövzulardan biridir.

Ədəbiyyat qəzeti.- 2012.- 2 noyabr.- S.6.