Fəridə xanımı xatırlayarkən...

Gəncə ədəbi mühitinin yetirməsi olan tanınmış şair Fəridə Əliyarbəyli 1924-cü ildə Nizami yurdunda doğulmuşdu, 2011-ci il oktyabrın 25-də 87 yaşında dünyasını dəyişdi, vətənində torpağa tapşırıldı. Uzun illər Azərbaycan Yazıçılar Birliyi Gəncə filialının məsul katibi işləmiş Fəridə xanım maraqlı həyat və yaradıcılıq yolu keçərək şeir kitabları ilə oxucuların sevimlisinə çevrilmişdir.

Azərbaycan Yazıçılar Birliyi Gəncə bölməsinin şəhər mərkəzi kitabxanasında keçirdiyi ədəbi tədbir "Fəridə xanımı xatırlayarkən..." adlanırdı. Dünyasını dəyişməsinin birinci ildönümü ərəfəsində təşkil olunan, şair və yazıçıların, mədəniyyət işçilərinin, tələbə gənclərin, mərhumun ailə üzvlərinin toplaşdığı xatirə məclisini AYB Gəncə bölməsinin sədri, əməkdar incəsənət xadimi Məmməd Alim açaraq "ədəbi anamız" deyə səciyyələndirdiyi Fəridə Əliyarbəylinin ömürlüyünü səhifələdi, sənətinin özəlliklərini konkret bədii nümunələrlə əsaslandırdı, şeir, poema və pyeslərinin toxunduğu lirik, ictimai mətləblər üzərində dayandı, görkəmli sənətkar, qayğıkeş ana və qeyrətli xanım kimi bütün gəncəlilər tərəfindən ehtiramla anıldığını vurğuladı, xatirəsinə həsr etdiyi "Yaşıl söz ağacı" şeirini oxudu.

Şair və yazıçılardan Rübail, Aləmzər Əlizadə, Nadir Ovçu, Bəxtiyar Yunisoğlu, İsmayıl Abbas, Samirə Səma, Ülfət Cavad, Allahverdi Nuraib və müəllim Fazil Kazımov çıxış edərək Fəridə xanımın xatirəsinə hörmət və ehtiramlarını şeirlərlə bildirdilər, onunla unudulmaz görüşlərindən epizodlar danışdılar, gənc ədəbi nəslə qayğı ilə yanaşmasını yada saldılar, kitablarının məziyyətlərindən söz açdılar, Azərbaycan poeziyasının qadın sənətkarları sırasında layiqli yer tutduğunu dilə gətirdilər. Gəncə Dövlət Universitetinin 1-ci kurs tələbələri Aytac Abbasquliyeva, İlkanə Əmirova və Mələk Novruzova Fəridə xanım Əliyarbəylini şəxsən görməsələr də, yaradıcılığı ilə tanış olduqlarını, əsərlərini sevə-sevə oxuduqlarını şairin şeirlərini əzbər söyləməklə təsdiqlədilər.

Fəridə Əliyarbəylinin nəticəsi, 1-ci sinif şagirdi balaca Fəridənin ulu nənəsinin şeirini əzbər söyləməsini tədbir iştirakçıları əsl sürpriz kimi qarşıladılar. Şairin ailə üzvləri - oğlu İlham Tağıyev, qızı Nəzakət Hacıyeva və gəlini Raida Tağıyeva Fəridə xanımın anım gününün keçirilməsinə, xatirəsinin hörmətlə yad olunmasına görə AYB-nin Gəncə bölməsinə, şəhər mədəniyyət və turizm idarəsinə, mərkəzi kitabxanaya, bütün tədbir iştirakçılarına minnətdarlıqlarını bildirdilər, şairi təkcə söz ustası kimi deyil, səmimi insan, etibarlı ömür-gün yoldaşı, mehriban ana və qayğıkeş nənə kimi də səciyyələndirdilər.

Gəncə şəhər Mərkəzləşdirilmiş Kitabxana sisteminin direktor müavini Fəridə Qədimova AYB-nin Gəncə bölməsi ilə birgə keçirdikləri ədəbi tədbirlərin əhəmiyyətini qeyd edərək unudulmaz Fəridə xanım Əliyarbəylinin bugünkü xatirə məclisinin təşkilinə görə də təşəkkürünü bildirdi, şairlə görüşlərini heç vaxt unutmayacağını vurğuladı.

Xatirə məclisinin iştirakçıları mərkəzi kitabxananın oxu zalında Fəridə xanım Əliyarbəylinin əsərlərindən ibarət kitab sərgisi ilə, qəzet və jurnal materialları ilə tanış oldular. Tədbirə toplaşanlara ailəsi tərəfindən Fəridə xanımın kitabları hədiyyə verildi. Məclisi yekunlaşdıran AYB Gəncə bölməsinin sədri Məmməd Alim Fəridə xanımın anım gününə toplaşanlara, tədbirin keçirilməsində əməyi olan hər bir kəsə minnətdarlığını bildirdi.

AYB-nin Gəncə bölməsi

Ədəbiyyat qəzeti.- 2012.- 2 noyabr.- S.4.