Mənim yadigarlarım

Mən öləndə

səbrim əmanət qalacaq

Mənim yadigarım

dözümüm olacaq.

İnamım bayraq kimi

dalğalanacaq

tabutumun üstündə.

Sözümü üzə demişəm,

yatmamışam marığa

heç kimin qəsdində.

Miras qalan halallığıma

kimin qəlbi yatacaq?

Təmiz məhəbbətimlə

kim pisliyi atacaq?

Paxıllığım olmayıb,

ömrümdə bədxahlıqdan

bir nişanə qalmayıb.

Nəfsimdən arxayınam,

məni məndən almayıb!

Məndən miras qalanlardan

kim duya bilər

təmizliyimi, kövrəkliyimi,

Dosta gərəkliyimi,

Əlimin çörəkliyini?

Kədərimi heç kimə

yadigar vermirəm,

aparacağam özümlə

qəbrimdə azdırmağa,

əbədilik basdırmağa…

Şəhidlər deyirdi

Şəhidlər xiyabanında düşüncələr

Vətəni qoruya bilmədik,

Çiçək açan vətəndə

doyunca sevinib-gülmədik!

Qanımız axan yerləri

vicdanları kimi satdılar.

Şəhid olanların kölgəsində

xorul-xorul yatdılar.

Yalandan and içdilər

sinələrinə döyüb,

söz verdilər,

qoruyacaqlar vətəni.

İştahları güc gələndə,

nə səni düşündülər,

nə bu eli, nə məni!

Vətəni qoruya bilmədik,

arxamızca gələn olmadı.

Vətən eşqi

manqurtların ürəyinə

sevgi kimi dolmadı.

Hamı vətəndən danışdı,

vətən dedi.

Ancaq vətəni satdığı pula

çörək yedi, maşın aldı.

İndi susub laldı.

hayıf,

vətəni qoruya bilmədik!

Ancaq deyirlər, şəhidik!

Vətən torpaqları əsirdirsə,

səsimiz bu məzarı

aşa bilmirsə,

bizə şəhidlik yaraşmır!

Vicdanı satılmışlara

nə ad verək?!

Torpaq altında da

rahat olmur ürək!

Ağ atlı sözlər

Sözlər də ağ atlı oğlan kimidir,

öz cıdır düzünü soraqlayır o.

Sözlər səyahətə çıxan gəmidir,

coşqun ləpələri varaqlayır o.

Ağ baxtım kimidir, ağ atlı hər söz,

mənə sevinclərdən soraq gətirir.

Sanki yollarımda parlayır ulduz,

çılğın harayıma özün yetirir.

Ağ atlı oğlan tək ağ atlı sözlər,

sevinc bəxş eləyir ömrümə mənim.

Açılır qarşımda dərələr, düzlər,

çiçək-çiçək olur çölüm,çəmənim.

Çəkir cilovunu sözlü ağ atlı,

misralar, sətirlər nura boyanır.

Ağ atlı sözlərin nal səslərindən

mənim şair təbim erkən oyanır.

Üfüqlər qarşımda açılır rəng-rəng,

həyat misraları qəlbimə düzür.

Ağ atlı sözlərin cıdır düzündə

şeir yarışında beləcə süzür.

Ağ atlı sözlərdir ömrümə düşən,

ağ atlı sözlərlə üzüm ağ olur.

Ağ atlı sözlərin şəfəqləridir,

mənim bu sevdalı qəlbimə dolur…

İltifat Saleh

Ədəbiyyat qəzeti.- 2012.- 9 noyabr.- S.5.