Rəsul Rzanın ev muzeyində

Ustad şairimiz Rəsul Rzanın lirikasında vaxt, zaman, "ömrün dəyərini müəyyənləşdirən məhək daşı - meyar kimi" təqdim olunur. Böyük şair tarixin hər mərhələsinə ayağının altındakı bir pillə dəyərilə yanaşırdı. Yazırdı ki:

Gələcəkdən indiyə gəlir,

İndidən keçmişə gedir

Yorğunluq bilməyən zaman!

Rəsul Rza dünyanı bütün istisiylə, soyuğuyla bir arada insan evi olaraq qəbul edir, azına da, çoxuna da "min şükür" deyirdi. "Pəncərəmi açdım sabaha - gördüm insanlar keçib gedir" - şükranlığıyla yazıb-yaradırdı. Bütün mənəvi sərvətlərin əbədi yer alması, göz önündə olması üçün "mənə bir salon, bur muzey verin" - arzusunu dilə gətirirdi.

O qudsal, ölümsüz, könül çəkən muzeylər sırasında tarixiləşib ustad sənətkarın Göyçay şəhərindəki ev muzeyi. Vaxtaşırı ziyarət olunur, əbədi vəfa borcundan qaynaqlanan ürək sözləri dilə gəlir.

Yenə də belə oldu. Ölməz xalq şairinin uşaqlıq, gənclik, ahıl çağlarının unudulmaz xatirələrini qoynuna alan ev muzeyi dərin qədirbilənliklə ziyarət edildi. Təşrif buyuranlar arasında Qazaxıstan Respublikasının ölkəmizdəki səfiri Serik Primbetov və səfirliyin digər məsul işçiləri, Türkiyə Cümhuriyyətinin Azərbaycandakı səfirinin birinci müavini Maral xanım, eyni zamanda, səfirliyin digər məsul işçiləri var idi.

Türkiyə Universitetləri Məzunları İctimai Birliyinin sədri Çingiz Bayramov və təşkilatın kollektivi, Türkiyədən qonaq gəlmiş müəllim Rafiq Sarı, İqtisad Universitetinin bir qrup müəllim və tələbə heyəti, Göyçay rayon İcra Hakimiyyəti aparatının, təhsil və səhiyyə işçilərinin iştirak etdiyi ziyarət zamanı qonaqlar böyük bir tarixi özündə ehtiva edən qiymətli eksponatlarla tanış oldular. Muzeyin xatirə kitabına ürək sözləri yazıldı.

Görkəmli sənətkarın oğlu, xalq yazıçısı Anar mərasimdə çıxış edərək ailələri adından Rəsul Rzanın xatirəsini əziz tutan insanlara, tədbirə qatılan qonaqlara öz minnətdarlığını bildirdi. Sonda xatirə şəkli çəkdirildi.

Sərvaz Hüseynoğlu

Ədəbiyyat qəzeti.- 2012.- 9 noyabr.- S. 2.