Moldovada Nizami Gəncəvinin aforizmlərindən ibarət kitabın təqdimatı olmuşdur

Mətbuatdan məlum olduğu kimi Moldovada Azərbaycan Mədəniyyəti günləri çərçivəsində noyabrın 13-də Əfqan Rəsulov, Ruslan Hüseynov və Elvin Bəşirovdan ibarət caz qrupu Komrat şəhərində konsert proqramı ilə çıxış etmişlər.

Böyük maraqla qarşılanan konsertdə sənətçilərimizin ifası tamaşaçıların marağına səbəb olmuş və dəfələrlə alqışlanmışdır.

Paytaxt Kişinyevin "Odeon" Mədəniyyət Mərkəzində isə Azərbaycan kinosu günləri davam edir. Moldova sakinləri və Kişinyevdə yaşayan həmvətənlərimiz noyabrın 13-də "Girov" bədii filminə tamaşa etmişlər.

Ekran əsərinin nümayişdən əvvəl çıxış edən Dövlət film fondunun direktoru, əməkdar incəsənət xadimi Cəmil Quliyev milli kino sənətimizin tarixi, Azərbaycan və Moldova arasında qarşılıqlı əlaqələr barədə maraqlı məqamlarla iştirakçıları tanış etmişdir.

Noyabrın 14-də Moldova Milli Kitabxanasında dahi Azərbaycan şairi və mütəfəkkiri Nizami Gəncəvinin aforizmlərindən ibarət Azərbaycan, rumın, ingilis və rus dillərində nəşr olunmuş miniatür kitabın təqdimat mərasimi keçirilmişdir.

Şairin 870 illik yubileyi münasibətilə Moldova Azərbaycanlıları Konqresinin təşəbbüs və dəstəyi ilə işıq üzü görmüş nəşrin təqdimetmə mərasimində Azərbaycan nümayəndə heyəti ilə yanaşı, Moldovanın tanınmış ziyalıları, incəsənət xadimləri, şair və yazıçılar, deputatlar, dövlət və hökumət nümayəndələri, səfirlər iştirak etmişlər.

Moldova Milli Kitabxanasının direktoru Aleksey Rau dahi Nizaminin yaradıcılığından bəhs edərək bildirmişdir ki, təkrarolunmaz yaradıcılığı ilə bəşər mədəniyyətini, ədəbiyyatını zənginləşdirən Nizami Gəncəvinin yaradıcılığı dünya klassiklərinin əsərləri sırasında şərəfli mövqe tutur. Bildirilmişdir ki, Nizami Gəncəvi poeziyası əsrlər boyu o qədər uca zirvədə olmuşdur ki, şairin bir çox misraları zərbi-məsələ çevrilərək insanların şüuruna təsir göstərmiş, özünün əsl xalq təfəkkürü və məntiqi ilə psixologiya, pedaqogika və folklora nüfuz etmişdir.

Moldovanın mədəniyyət naziri Boris Fokşa, Azərbaycan Respublikası mədəniyyət və turizm nazirinin müavini Ədalət Vəliyev, ölkəmizin Moldovadakı səfiri Namiq Əliyev, Moldova Azərbaycanlıları Konqresinin prezidenti Vüqar Novruzov, kitabın rumın dilinə tərcüməçisi, tanınmış yazıçı, Moldova parlamentinin deputatı İon Xadırke və başqaları bir daha Nizami dühasından, onun böyüklüyündən söz açmışlar.

Tədbirdə Moldova Azərbaycanlıları Konqresinin yekdil qərarı ilə Konqresin xüsusi mükafatı və diplomu tanınmış yazıçı İon Xadırkeyə təqdim olunmuşdur.

Moldovada Azərbaycan Mədəniyyəti günləri dünən başa çatmışdır.

Ədəbiyyat qəzeti.- 2012.- 16 noyabr.- S.1.