Əli İldırımoğlu - 85

Hörmətli Əli müəllim!

Sizi - görkəmli yazıçı və publisisti 85 yaşınızın tamam olması münasibətilə təbrik edirik.

Sizin imzanız yarım əsrdən artıqdır ki, oxuculara tanışdır. 1952-ci ildə Qubadlı rayonunun "Avanqard" qəzetində işləməyə başlamısınız. 1955-ci ildən "Kommunist" qəzetində xüsusi müxbir kimi uzun illər səmərəli fəaliyyət göstərmiş, milli jurnalistikamızın inkişafına öz töhfənizi vermisiniz. Yaradıcılığa publisist kimi başlamış, bir müddət sonra isə nəsrə müraciət etmiş, çox məhsuldar çalışaraq hekayə, povest, roman janrlarında dəyərli nəsr nümunələri yaratmısınız. Bir-birinin ardınca oxuculara təqdim etdiyiniz "Həmin adam", "Zorən jurnalist", "Közərən sətirlər", "Mənim rəncbər atam", "Qarlı gecələr", "Aqibət" romanlarınızda bu janrın ədəbi-bədii, estetik qayəsindən bacarıqla istifadə edib mövzu seçimi, həyati faktlara yeni münasibət və sənətkarlıq baxımından səciyyələnən qiymətli əsərlər yaratmısınız. Siz yaşınızın bu çağında da yorulmadan yazıb-yaradırsınız. "Mənim rəncbər atam" romanı Türkiyədə, İranda, Rumıniyada nəşr edilmiş, "Zorən jurnalist", "Aqibət" romanlarınız İstanbulda işıq üzü görmüşdür. Povest, hekayə, oçerk və felyetonlardan ibarət "Dərd", "Telepat", "Silinməz izlər", "Mayaklar", "Çinarlı" adlı kitablarınız da maraqla qarşılanmışdır.

Yaradıcılığınız "Şöhrət" ordeni, "Əməkdar jurnalist" fəxri adı, Azərbaycan SSR Ali Sovetinin fəxri fərmanı, "Qızıl qələm", "Araz" ali mükafatı Beynəlxalq Elmlər Akademiyasının "Türk ədəbiyyatına xidmət" və s. mükafatlarla dəyərləndirilmişdir.

Hörmətli Əli müəllim!

Sizi bir daha yubileyiniz münasibətilə təbrik edir, sizə uzun ömür, cansağlığı, yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2012.- 16 noyabr.- S.4.