Şirindil Alışanlı - 60

Bu günlərdə AYB-nin Natəvan klubunda görkəmli alim, tənqidçi-ədəbiyyatşünas, filologiya elmləri doktoru, professor Şirindil Alışanlının 60 illik yubileyi böyük təntənə ilə qeyd olundu. AYB-nin AMEA Nizami adına Ədəbiyyat İnstitutu ilə birgə keçirdiyi yubiley tədbirinin aparıcısı Arif Əmrahoğlu giriş sözündə alim həmkarı Ş.Alışanlının keçdiyi həyat və yaradıcılıq yoluna ötəri də olsa bir nəzər salaraq onun tənqid və ədəbiyyatşünaslığımıza gətirdiyi yeni yanaşma və modern konsepsiyalardan danışdı. Natiq qeyd etdi ki, Şirindil Alışanlı kimi istedadlı gənclərin timsalında 70-ci illərin ənənəvi tənqidi yeni ruh və biçimdə köhnə stereotiplərdən yaxasını qurtara bildi. Ədəbiyyatın arxasınca sürünən tənqid ədəbiyyatın önündə getməyə başladı ki, bunun özü bir böyük hadisə idi. Ş.Alışanlının bu yöndəki xidmətləri əvəzsizdir.

AYB-nin sədri, xalq yazıçısı Anar çoxdan tanıdığı Ş.Alışanlıya ədəbi duyumuna, sağlam təfəkkürdən gələn eridusiyasına, obyektiv və prinsipial mövqeyinə görə hər zaman hörmət bəslədiyini vurğuladı. Xalq yazıçısı sözünün tamamında hələ cavan görünən yubilyara həmişə belə şux və sağlam ömür, yeni-yeni yaradıcılıq uğurları arzuladı.

AMEA-nın müxbir üzvü, f.e.d.Teymur Kərimli 40 ildən bəri tanıdığı saf və səmimi insan, qayğıkeş və etibarlı dost, geniş diapazonlu alim Ş.Alışanlının 60 illik yubileyinin Natəvan klubunda keçirilməsinə görə öncə AYB rəhbərliyinə təşəkkür etdi və sonra yubilyar dostunun həm insanlığa, həm elmimizə örnək ola biləsi məziyyətlərindən danışdı.

F.e..d., professor Kamran Əliyev Ş.Alışanlının görkəmli alim kimi yetişməyində çox mühüm rol oynamış müəllimlərini xatırladı, 70-ci illərdə BDU-nun filologiya fakültəsindəki elmi-ədəbi mühiti və tədris prosesini yada saldı. Belə qənaətə gəldi ki, məhz həmin 70-cilərin böyük bir qisminin bu gün Ədəbiyyat İnstitutunda ciddi elmi fəaliyyətlə məşğul olmaları, ad-san qazanmaları təsadüfi deyil…

AMEA-nın müxbir üzvü Fəridə Vəlixanova Ş.Alışanlının elm aləmində qazandığı uğurları, eyni zamanda onun Moskvada aldığı təhsillə, Y.Borev kimi müəllimlərinin zəhməti ilə əlaqələndirdi və belə qənaətə gəldi ki, həm Azərbaycan, həm rus ədəbiyyatına, ədəbiyyatşünaslığına, nəzəri fikrinə yaxından bələdçilik özünün belə dəyərli nəticəsini vermişdir.

Yubiley mərasimində çıxış edən digər alimlərdən Məhərrəm Qasımlı, Nizaməddin Şəmsizadə, Asif Rüstəmli, Qurban Bayramov, Vaqif Yusifli, Adil Cəmil, Sara Osmanlı, Ələmdar Cabbarlı da Ş.Alışanlı haqqında etibarlı dost, qayğıkeş insan, dəyərli alim kimi danışaraq onu 60 yaşının tamamı münasibətilə ürəkdən təbrik edib sağlam ömür və yaradıcılıq uğurları arzuladılar.

Tədbirdə AMEA Həmkarlar İttifaqı və "Aşıq Şəmşir Mədəniyyət Ocağı" İctimai Birliyinin diplom-mükafatları da yubilyara təqdim olundu.

Sonda Ş.Alışanlı bütün iştirakçılara, həmçinin AYB rəhbərliyinə dərin təşəkkürünü bildirdi.

A.Savalan

Ədəbiyyat qəzeti.- 2012.- 16 noyabr.- S.6.