Hər sözdən dünyaya bir işıq düşür…

Əbülfət Mədətoğlu. "Mənim kimi sevə bilsən".

"Gənclik" nəşriyyatı - 2012

Könlü-gözü günəşdən əvvəl işıqlı dünyaya açan, bütün doğmalardan öncə adamı inama səsləyən, sinəyə sıxan bir aləmin könül pıçıltıları ürpərir Əbülfət Mədətoğlunun "Mənim kimi sevə bilsən" adlı şeirlər kitabından. Bəs elər ki, aşağıdakı misraların təzə-tərliyindən barına biləsən, özünü o yerə qoyub könlündən keçəni deyə biləsən:

Nə olar, yuxudan oyanıb hərdən

Gör ki, yatağına bir işıq düşür.

Bütün ömrü "bir anın məntiqinə tabe olan" bu istedadlı şairin səmimi deyim tərzindən, poetik düşüncəsinin təzə-tərliyindən doymaq olmur ki, olmur. O, göy dərinliyinə çəkilmək istəyini, sozalan ümidlərə göz ola bilmək arzusunu şeirin, sözün yeddi qatından təbii ştrixlərlə keçirə bilir, yaranmış gözəlliklərin gözlərinə baxmaq üçün göz ola bilməməsinin təəssüfünü gözəl yaşayır.

Əbülfətin elə yığcam lakonik, təbii şeirləri var ki, onları ayrı-ayrı misralara, mənglərə bölərək, tamlığını pozaraq təqdim etməyə adamın əli gəlmir. Sadəcə üzünü köçürmək zorunda qalırsan:

Pəncərəmin önünə

Qonan cüt göyərçinə

Elə həsrətlə baxdım -

Uçdular.

Dən səpdim, dönmədilər,

fit çaldım, dinmədilər,

Nə çəkdim, bilmədilər,

Uçdular…

Bilməzdim qısqancdılar,

Baxışı qısqandılar,

Bir həsəd qazandılar -

Uçdular…

Bütün ifadə, deyim, fikir yükü və poetik ovqat baxımından təzə, təravətli və orijinaldı, təqdirəlayiqdir.

Eyni bütövlük, tamlıq meyarı ilə oxunur Ə.Mədətoğlunun silsilə adsız şeirləri.

Bu maraqlı kitaba əhatəli ön söz yazan ədəbiyyatşünas alim Rüstəm Kamal da fərqindədir ki, Əbülfətin hər bir şeri "bitib-tükənməyən monoloqun hissələridir, qafiyələrlə, məkrarlarla ayrılmış bütöv bir səsdir… Hər bənd, hər beyt ürəyin döyüntüsü, cümlədə pauzadır, nəfəsdərmədir…"

Təbii ki, belədi və o yerdə ki, tənqidçi ilə yazıçının mövqeyi eyni məqamda kəsişir, üst-üstə düşür, deməli ədəbi əsərin yaşamaq haqqı ikiqat isbatlanır.

Bu misralar Əbülfətin yozumunda necə də məntiqli, ifadəli səslənir:

Divarların arası

Boşluğun nəfəs yeri.

Dərində söz yarası -

Götürmək olmur geri…

Şair "Susdum, sözüm böyüdü sevən ürəklər üçün" misrasında yaddaqalan,

Bir azların içində

Bir az sənin üçün də,

Bir az mənim üçün də

Qalmışdım… -

deyimində təbii və orijinaldı.

Şeirin yolu, şairin yaşarılığı bu təbiilikdən, səmimiyyətdən keçir.

Sərvaz

Ədəbiyyat qəzeti.- 2012.- 16 noyabr.- S.8.