Azərbaycan Yazıçılar Birliyində

Əli İldırımoğlu-85

Ömrün 85 illik zirvəsindən boylanıb baxdıqca doğulub boya-başa yetdiyi Qubadlı rayonunun Əliquluuşağı kəndi qənşərindən keçən Bərgüşad çayının axarına bənzər illərin unudulmaz xatirələri iplik-iplik düzümlənir tanınmış yazıçı-publisist Əli İldırımoğlunun gözləri önündə. Bitib-tükənmir ki, bu xatirələr… Adətən belə ömürlər kamillik məktəbi kimi vərəqlənir.

Elə yaxın günlərdə öz işinə böyük əmək sərf etmiş bu dəyərli qələm adamının 85 illik yubileyilə bağlı Azərbaycan Yazıçılar Birliyində keçirilən tədbirdə çıxış edənlər də onun ömür salnaməsini dərin ehtiramla vərəqlədilər. Tədbiri AYB-nin katibi, "525-ci qəzet"in baş redaktoru açaraq yubilyarın sənət yolundan ətraflı bəhs etdi.

Xalq yazıçısı, AYB-nin sədri Anar, xalq şairi, AYB-nin birinci katibi Fikrət Qoca, ədəbiyyatşünas alim Qurban Bayramov, xalq artisti Rasim Balayev, türkiyəli yazar Mustafa Saatçı, şair və yazıçılardan Mahirə Abdulla, Ramiz Rövşən, Yaşar Əliyev, bədii qiraət ustası Ağalar Bayramov, filologiya üzrə fəlsəfə doktoru Cahid İsmayıloğlu və başqaları da qələm yoldaşlarının sənət uğurlarından, özünəməxsus yaradıcılıq yolundan bəhs etdilər, onun milli-mənəvi dəyərlərin yaşadılmasına hesablanan əsərlərinin tərbiyəvi əhəmiyyətindən söz açdılar, Sumqayıt şəhər İcra Hakimiyyəti rəhbərliyinin hədiyyəsi yubilyara təqdim edildi.

Çıxışlarda vurğulandı ki, Əli İldırımoğlu bu gün də gənclik ehtirası, müdrik düşüncəsi ilə baş-başa yazıb-yaradır, maraqlı əsərlər üzərində işləyir.

S.Hüseynoğlu

Ey anıb axtaranlarım!

Allaha inamım, ata-babama ehtiramım, övladlarıma məhəbbətim, elimə-obama bağlılığım, vətənə sədaqətim, gücsüzlərə köməkliyim, yazıqlara rəhmim, yolunu azanlara qəzəbim - əyilən qəddim, qıyılan gözlərim, pozulmuş səhhətim, yuxusuz gecələrim, narahat günlərim, gərginləşən əsəblərim - sevincim, kədərim, tapdığım və itirdiyim uğurlar, dosta etibarım, gəncliyimin əzabları, ahıllığımın gileyləri kitablarımın əmanətindədir. Məni və mənimi bilmək istəsəniz ömür salnaməmin natamam parçası olan əsərlərimi vərəqləyin.

Əli İldırımoğlu

Ədəbiyyat qəzeti.- 2012.- 23 noyabr.- S.5.