Astanada türk dünyası ədəbi jurnallarının 5-ci konqresində Azərbaycanın xalq yazıçısı Anara “Türk dünyasında 2012-ci ilin ədəbiyyat adamı” mükafatı təqdim edilib

Noyabrın 22-də Astanada türk dünyası ədəbi jurnallarının 5-ci konqresi öz işinə başlamışdır.

Tədbirdə Azərbaycan, Qazaxıstan, Türkiyə, İran, Özbəkistan, Ukraynanın Krım Muxtar Respublikasından, Rusiyanın Tatarıstan, Başqırdıstan respublikalarından, Şimali Kiprdən gəlmiş alim, yazıçı və şairlər, ədəbi jurnalların baş redaktorları, jurnalistlər iştirak edirlər.

Konqresdə Azərbaycan Yazıçılar Birliyinin (AYB) sədri, xalq yazıçısı Anar, AYB-nin katibi Rəşad Məcid, “Ulduz” jurnalının baş redaktoru Elçin Hüseynbəyli iştirak edirlər.

Mərasimi Qazaxıstan Yazıçılar İttifaqının sədri Nurlan Orazalin açmışdır. O, türk dünyası arasında əlaqələrin dərinləşməsində mədəniyyət və ədəbiyyatın mühüm rolu olduğunu bildirmiş, bu sahədə əməkdaşlığın daha da genişlənməsinin vacibliyinə toxunmuşdur.

TÜRKSOY-un baş katibi Düsen Kaseinov indiyədək bu sahədə keçirilmiş tədbirlərin mühüm əhəmiyyət daşıdığını vurğulamışdır.

Avrasiya Yazarlar Birliyinin sədri Yaqub Öməroğlu ötən konqresdə “Türk dünyasında 2012-ci ilin ədəbiyyat adamı” adının Azərbaycan yazıçısı Anara verilməsi haqqında razılıq əldə olunduğunu bildirmişdir.

Sonra Azərbaycan Yazıçılar Birliyinin sədri Anar səhnəyə dəvət edilmiş və mükafat ona təqdim olunmuşdur.

Xalq yazıçısı Anar ona “Türk dünyasının 2012-ci ilin ədəbiyyat adamı” adının verilməsinə görə minnətdarlığını bildirmiş, bundan sonra da türk dünyası arasında ədəbi, mədəni sahələrdə əlaqələrin genişləndirilməsi istiqamətində fəaliyyətini davam etdirəcəyini bildirmişdir.

Konqres noyabrın 24-də başa çatacaq.

Qulu Kəngərli,

AzərTAc-ın xüsusi müxbiri

Astana

Ədəbiyyat qəzeti.- 2012.- 23 noyabr.- S.2.