Azərbaycanın baş prokurorunun başçılıq etdiyi nümayəndə

heyəti Beynəlxalq Antikorrupsiya Akademiyasının

illik iclasında iştirak etmişdir

Azərbaycan Respublikasının Prezidenti İlham Əliyevin rəhbərliyi ilə ölkədə mütəşəkkil cinayətkarlığın təhlükəli təzahürlərindən olan korrupsiyaya qarşı aparılan mübarizə tədbirləri çərçivəsində beynəlxalq əməkdaşlığa mühüm önəm verilir. "Beynəlxalq Antikorrupsiya Akademiyasının beynəlxalq təşkilat qismində təsis edilməsi haqqında" Sazişə qoşulması barədə Azərbaycan Respublikası Qanununun qəbul olunması əməkdaşlıq əlaqələrinin gücləndirilməsində əhəmiyyətli rol oynamışdır.

Ölkəmiz akademiyanın fəaliyyətə başladığı ilk gündən bu mötəbər təşkilatla sıx əlaqələr yaratmağa böyük önəm vermişdir. Azərbaycan nümayəndə heyəti təşkilatın inaqurasiya mərasimində iştirak etmiş, həmçinin 2011-2012-ci illərdə tədris ocağı tərəfindən təşkil edilmiş kurslarda Azərbaycan prokurorları nəzəri biliklərini inkişaf etdirərək praktiki təcrübələrini artırmışlar.

Baş Prokurorluğun mətbuat xidmətindən AzərTAc-a bildirmişlər ki, noyabrın 29-30-da Avstriyanın paytaxtı Vyana şəhərində Beynəlxalq Antikorrupsiya Akademiyasının beynəlxalq təşkilat kimi təsis edilməsi haqqında Sazişi ratifikasiya etmiş ölkə və təşkilatların yüksək vəzifəli nümayəndələrinin iştirakı ilə ilk iclası keçirilmişdir.

Tədbirdə Azərbaycan Respublikasının baş prokuroru Zakir Qaralovun rəhbərlik etdiyi, tərkibinə Korrupsiyaya Qarşı Mübarizə üzrə Komissiyanın katibi Vüsal Hüseynov, ölkəmizin Avstriya Respublikasındakı səfiri Qalib İsrafilov və Baş Prokuror yanında Korrupsiyaya Qarşı Mübarizə İdarəsinin rəisi Kamran Əliyevin daxil olduğu nümayəndə heyəti iştirak etmişdir. Ümumilikdə 60-dan çox ölkə və təşkilatın nümayəndələrinin, beynəlxalq müşahidəçilərin iştirak etdikləri Assambleyada çıxış edən Azərbaycan Respublikasının baş prokuroru korrupsiyaya qarşı mübarizənin Prezident İlham Əliyevin siyasi fəaliyyətinin prioritet istiqaməti olduğunu qeyd edərək, ölkəmizin bu sahədə bütün beynəlxalq təşəbbüslərə qoşulduğunu, beynəlxalq konvensiyaların ölkə qanunvericiliyinə implementasiyasının həyata keçirildiyini, hüquqi və institusional bazanın təkmilləşdirilməsi istiqamətində önəmli addımlar atılaraq Azərbaycan Respublikasının korrupsiyaya qarşı mübarizə sahəsində qanunvericiliyinin beynəlxalq standartlara uyğunlaşdırıldığını diqqətə çatdırmışdır.

Nümayəndə heyətinin rəhbəri, həmçinin dövlətimizin başçısının rəhbərliyi və təşəbbüsü ilə son dövrlərdə həyata keçirilmiş qanunverici və praktiki tədbirlər, o cümlədən açıq hökumətin təşviqinə və korrupsiyaya qarşı mübarizəyə dair 2012-2015-ci illər üçün Milli Fəaliyyət planları, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin yaradılması və funksiyaları, Baş Prokuror yanında Korrupsiyaya Qarşı Mübarizə İdarəsinin fəaliyyətinin təkmilləşdirilməsi istiqamətində həyata keçirilmiş tədbirlər və onların müsbət nəticələri barədə ətraflı məlumat vermiş, habelə ölkəmizin Beynəlxalq Antikorrupsiya Akademiyası ilə bundan sonra da sıx əməkdaşlıq edəcəyini vurğulamışdır.

Tədbir zamanı akademiyanın rəhbəri Martin Kreutner və digər yüksək vəzifəli nümayəndələrlə keçirilmiş ikitərəfli görüşlərdə qarşılıqlı əməkdaşlığın perspektivləri müzakirə edilmişdir. Həmçinin Malayziya, Latviya, Koreya Respublikası, Tacikistan və digər ölkələrin nümayəndə heyətləri ilə görüşlərdə korrupsiyaya qarşı mübarizə sahəsində həyata keçirilən tədbirlər barədə ətraflı məlumat verilməklə bu istiqamətdə gələcək əməkdaşlığın perspektivləri müzakirə edilmişdir. Azərbaycan Respublikasında korrupsiyaya qarşı mübarizə tədbirlərini özündə əks etdirən bukletlər və baş prokurorun çıxışının mətni tədbir iştirakçılarına paylanmışdır.

Assambleya gündəlikdə olan cari məsələlərə baxmış, o cümlədən təşkilatın İdarəetmə Şurasının üzvləri seçilmiş, yeni Prosedur Qaydalar qəbul edilmiş və növbəti ilin İşçi Proqramı və büdcə məsələləri müzakirə edilmişdir.

Beynəlxalq Antikorrupsiya Akademiyasının 2-ci iclasının 2013-cü ildə Tailand Krallığında keçirilməsi qərara alınmışdır.

Azərbaycan.-2012.- 4 dekabr.- S.5.