Məmməd Səid Ordubadi - 140

Azərbaycan ədəbiyyatında tarixi roman janrının banisi, satirik-publisist Məmməd Səid Ordubadinin dramaturgiyamızın zənginləşməsində böyük xidmətləri olmuşdur. Onu Azərbaycan ədəbiyyatında daha çox şöhrətləndirən yazdığı tarixi romanlar silsiləsidir. O, həm də kəskin qələmli jurnalist kimi tanınmış "Molla Nəsrəddin" jurnalının fəal iştirakçılarından biri olmuşdur.

Şair, dramaturq və ictimai xadim Məmməd Səid Ordubadinin anadan olmasının 140 illik yubileyinin keçirilməsi ilə əlaqədar Azərbaycan Respublikasının Prezidenti cənab İlham Əliyev 10 aprel 2012-ci il tarixli sərəncam imzalamışdır. Bu sərəncama əsasən Cəlil Məmmədquluzadə adına Naxçıvan MR Ədəbiyyat Muzeyində də bir çox işlər həyata keçirilmişdir. Ədibə həsr olunmuş guşə yeni eksponatlarla zənginləşdirilmiş, muzeydə "Tarixi romanlar ustadı" mövzusunda tədbir keçirilmişdir.

Tədbirdə muzeyin direktor əvəzi İradə Məhərrəmova, Naxçıvan MR Yazıçılar Birliyinin sədri, şair Asim Yadigar, Naxçıvan MR Mədəniyyət və Turizm Nazirliyinin baş məsləhətçisi Həsən Kərimov, muzeyin baş fond mühafizi Xanım İsmayılova, muzeyin böyük elmi işçisi Günel Novruzova çıxış edərək şairin həyatı, çoxşaxəli yaradıcılığı, dövrümüz üçün aktual olan tarixi romanları haqqında danışdılar. Muzeyin əməkdaşları ədibin satirik şeirlərindən nümunələr səsləndirdilər.

Sonda tədbir iştirakçıları "Məmməd Səid Ordubadi - 140" sərgisi ilə tanş oldular. Sərgidə M.S.Ordubadinin həyat və yaradıcılığını əks etdirən müxtəlif illərə aid fotoşəkillər - "M.S.Ordubadi dostları arasında", "M.S.Ordubadi yazıçılar arasında", "Dumanlı Təbriz" tamaşasından səhnələr, xalq rəssamı Oqtay Sadıqzadənin yağlı boya ilə işlənmiş "M.S.Ordubadi" portreti, xalq rəssamı Maral Rəhmanzadə tərəfindən "Qılınc və qələm" əsərinə çəiklmiş illüstrasiyalar öz əksini tapmışdır. Məmməd Səid Ordubadinin müxtəlif illərdə nəşr olunmuş "Qılınc və qələm", "Dumanlı Təbriz", "Qanlı illər", "Gizli Bakı", "Döyüşən şəhər", "Seçilmiş şeirlər və hekayələr" və başqa kitabları, ədibin tədqiqatçıları Fəridə Vəzirovanın "Məmməd Səid Ordubadi", Yavuz Axundlunun "Məmməd Səid Ordubadi" kitabları, qəzet və jurnal materialları da sərginin maraqla baxılan eksponatlarındandır. Muzeyimizə gələn tamaşaçılara görkəmli ədibin həyat və yaradıcılığını əks etdirən sərgi haqqında ətraflı və dolğun məlumatlar verilir.

Günel Novruzova,

C.Məmmədquluzadə adına

Naxçıvan MR Ədəbiyyat Muzeyinin

böyük elmi işçisi

Ədəbiyyat qəzeti.- 2012.- 5 oktyabr.- S.8.