Ələmdar Quluzadə - 60

Hörmətli Ələmdar müəllim!

Sizi istedadlı şair və publisisti 60 yaşınızın tamam olması münasibətilə təbrik edirik.

Siz 1952-ci il yanvarın 7-də Əsgəran rayonunun Xocalı kəndində anadan olmusunuz. Kənd orta məktəbini bitirdikdən sonra Azərbaycan Pedaqoji İnstitutunun Xankəndi filialının Azərbaycan dili və ədəbiyyatı fakültəsini (1969-1973) bitirmisiniz. Hərbi xidmətinizi başa vurub Xocalı kənd orta məktəbində, Xankəndi şəhərindəki Qarabağ ipək kombinatının nəzdində olan 3 saylı fəhlə- gənclər məktəbində müəllim işləmisiniz. Sonralar Xankəndi şəhərində DQMV Radio Verilişləri Komitəsində Azərbaycan verilişləri redaksiyasının xüsusi müxbiri (1977-1988), Azərbaycan Televiziya və Radio Verilişləri Şirkətində radionun İqtisadiyyat və sosial həyat baş redaksiyasının baş redaktorunun müavini (1994-1996) olmuş, hazırda Uşaqlar üçün proqram redaksiyasının baş redaktorusunuz (1996-cı ildən).

Bədii yaradıcılığa "Familiyanız" şeirinizlə ("Şuşa" qəzeti - 1970) başlamısınız. "Dağların yaddaşı", "Tumurcuqlar", "Ömür-gün qabaqdadır", "İsti ocaq", "Beş qitənin uşaqları", "Qarabağ oyunu", "Şəhid şəhər", "Alay komandiri", "Mənə söz verin", "Məhləmizin uşaqları", "Məni yoldan eləmə", "Qadan mənə, Qarabağ" kimi çoxlu sayda kitabların müəllifisiniz.

Hörmətli Ələmdar müəllim!

Sizi bir daha yubileyiniz münasibətilə təbrik edir, sizə cansağlığı, uzun ömür, yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2012.- 13 yanvar.- S.6.