Zərəngiz Dəmirçi Qayalı - 50

Hörmətli Zərəngiz xanım!

Sizi - istedadlı şairimizi yubileyiniz münasibətilə təbrik edirik.

Siz bədii yaradıcılığa ötən əsrin yetmişinci illərinin sonunda başlamısınız. Oxucularla ilk görüşə 1979-cu ildə "Qalibiyyət bayrağı" qəzetində dərc olunmuş şeirinizlə gəlmisiniz. "Gənclik", "Ulduz", "Ədəbiyyat qəzeti", "Bakı" kimi mətbuat orqanlarında dərc olunan şeirləriniz maraqla qarşılanmışdır. "Haqqı sevdim", "Vəfam mənim", "Güllələnmişlər", "Qayalı" adlı kitablarınız işıq üzü görmüşdür. Azərbaycan Respublikası Mədəniyyət və Turizm Nazirliyinin dəstəyilə "Cavab ver" poemanız əsasında tamaşa hazırlanmış və uğur qazanmışdır. Ölkəmizin hüdudlarından kənarda da sizin yaradıcılığınız təbliğ olunur. 2010-cu ildə Təbrizdəki Şəhriyar ədəbi məclisinin dəvətilə İran İslam Respublikasının bir çox şəhərlərində şeirlərinizlə çıxış etmisiniz. Layiq görüldüyünüz "Ziya" mükafatı poeziyamızın Cənubi Azərbaycanda da dəyərləndirildiyini göstərir. Sizə həmçinin Türkiyənin Əskişəhər Bələdiyyəsi nəzdində fəaliyyət göstərən Əskişəhər Şairlər Məclisinin "Şərəf" mükafatı da təqdim edilib. Gürcüstanda yaşayan Azərbaycanlıların Mədəniyyət Mərkəzinin fəxri fərmanını almısınız. Aldığınız digər mükafatlar da sizin yaradıcılığınıza verilən qiymətin ifadəsi olduğu kimi, sizin də ədəbiyyatımızın təbliği sahəsindəki fəaliyyətinizin göstəricisidir. Siz AzərTAc-ın əməkdaşı kimi ölkəmizin ədəbi-bədii hadisələrinin, tədbirlərinin geniş işıqlandırılması üçün yorulmadan, böyük həvəslə çalışırsınız. Prezidentin xüsusi təqaüd fondunun təqaüdünə layiq görülmüsünüz.

Hörmətli Zərəngiz xanım!

Sizi bir daha yubileyiniz münasibətilə təbrik edir, sizə cansağlığı, uzun ömür, yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2012.- 27 yanvar.- S.6.