Sənətkarı xalq yaşadır

"Ədəbiyyatı bütün cinahlarında yeniliyə uğraşdıran islahatçı, Azərbaycan millətinə məxsus ərdəmliyin görkü" (Rahid Ulusel), ustad xalq şairi Rəsul Rzanın anım günü aprelin 1-də fəxri xiyabandakı məzarı önündə keçirildi.

Tədbirdə Rəsul Rza Fondunun sədri, AYB-nin birinci katibi, xalq şairi Fikrət Qoca çıxış edərək vurğuladı ki, böyük söz adamlarının doğum günlərini elə söz, ədəbiyyat günü kimi də qeyd etmək olar. Rəsul Rza belə görkəmli söz və fikir adamlarından biri idi. Böyük şairin adını daşıyan beynəlxalq ədəbiyyat mükafatı ənənəvi olaraq hər il onun doğum günündə təqdim edilir. Rəsul Rza gəncliyin böyük dostu, dünyanı öz "məni" üstündə kökləməyi bacaran sənətkar, əsərlərində qəlb dolusu duyulan dünyanı bütün çalarları ilə ifadə edən görkəmli söz ustası idi. Rəsul Rza yaddaşlarda kişiliyin, dözümün simvolu kimi yaşayır. Bu gün də bizimlədi, sabah da bizimlə olacaq.

Filologiya elmləri doktoru, professor Qəzənfər Paşayev də ustad sənətkardan gəncliyin hamisi, "işıq ideyasını və ideya işığını yaradan fikir mücahidi" kimi söz açdı. Dedi ki, görkəmli türk şairi Nazim Hikmətin "Hikmət dolu şeirləri ilə filosof, böyük fikir və zəka şairi" adlandırdığı Rəsul Rzanın istər poeziyasında, istərsə də publisistikasında fikir o qədər dərin, təsirli və mənalıdır, onun cazibəsindən çıxıb meydan açmaq həqiqətən də çətindir. Novator bir şair olmaqla yanaşı o, Suriyada Nəsiminin qəbrini aşkarlayan və ilk ziyarət edən, İraqda Füzulinin qəbrini ilk ziyarət edən, İraq türkmanlarından canı bir, qanı bir qardaşlarımız kimi ilk dəfə söz açan bir şəxsiyyət olmuşdur. O, xalq şairi Bəxtiyar Vahabzadənin dili ilə desək, "məna, məna" demədi, mənalar yaratdı…"

Yazıçılar Birliyi Lənkəran bölməsinin sədri, şair İltifat Saleh, şair və yazıçılardan Firuzə Məmmədli, Ədalət Əsgəroğlu, Sayman Aruz, Nafilə və başqaları da mərasimdə R.Rzanın Azərbaycan ədəbiyyatına verdiyi töhfələrdən söz açdılar, yeni şeirlərini oxudular. Bildirdilər ki, xalqımız var olduqca Rəsul Rza da var olacaq, yaşayacaq.

Sonda ustad sənətkarın oğlu, xalq yazıçısı Anar atasının xatirəsini əziz tutanlara ailələri adından təşəkkürünü bildirdi.

Sərvaz Hüseynoğlu

Ədəbiyyat qəzeti.- 2013.- 5 aprel.- S.2.