Görkəmli
qələm sahibi haqqında düşüncələr
Qələminə və şəxsiyyətinə
həmişə dərin rəğbət bəslədiyim,
maraqlı hekayələrin, orijinal pyeslərin, ssenarilərin,
dərin elmi-nəzəri əsərlərin müəllifi, əməkdar
incəsənət xadimi, xalq yazıçısı
Elçin müasir Azərbaycan ədəbiyyatının
sütunlarından biridir desəm, səhv etmərəm.
Onu oxucularına və tamaşaçılarına sevdirən
başlıca cəhət səmimiyyətidir. Elçin həyatda
da, sənətdə də çox səmimidir. Sözü
bir, əməli birdir. Mən onun çoxşaxəli
yaradıcılığına bələdəm, xüsusən
modern hekayələrini sevə-sevə oxuyuram. 60-70-ci illərdə
mən ingilis, fransız, ispan və ərəb dillərində
nəşr edilən “Moskoy-Nyus” qəzetinin Azərbaycan
üzrə xüsusi müxbiri olanda bu modern sənət
nümunələrindən birini həmin mətbu orqana
göndərmişdim, dərhal çap etmişdilər, belə
orijinal hekayəni təqdim etdiyimə görə təşəkkürlərini
də bildirmişdilər.
Mən Elçinin Azərbaycan
teatrlarında tamaşaya qoyulmuş bütün pyeslərinə
maraqla baxmışam və onun yaradıcılığı
haqqında tələbələrimə mühazirələr
oxumuşam və bu gün də Mədəniyyət və
İncəsənət Universitetində “Müasir Azərbaycan
dramaturgiyası” fənnindən dərs deyərkən
Elçin dramaturgiyasının özəlliklərindən,
mövzu və sənətkarlıq baxımından onun
dramaturgiyamıza gətirdiyi novatorluqdan məmnunluqla söz
açıram.
Bu yaxınlarda mən
Elçinin xalq yazıçısı Anarın 75 illiyi
münasibətilə “Ədəbiyyat qəzeti”ndə (15 mart
2013-cü il) çap etdirdiyi “Qocalığa hələ
çox qalıb” adlı əsərini (məqalə, yaxud
xatirə deməyə dilim gəlmir) birnəfəsə
oxudum. İlk cümləsindən məni ovsunlayan bu əsər poetik dili, şirin təhkiyə üslubu və
məhrəm duyğuların usta təsviri ilə məni
keçən əsrin altmışıncı illərinə
apardı. 60-cı illər ədəbiyyatının sıra
nəfəri kimi mən də sızıltılı nostalji
hisslər keçirdim, çox şeylər yadıma düşdü
və ilk olaraq Azərbaycan Dövlət Universitetində təhsil
aldığım illəri xatırladım.
1958-ci il. Ziyalılar evi (indiki
Atatürk mərkəzi). Ədəbiyyat
aləmində ilk addımlarını atan tələbələrin
fərəhli dəqiqələridir. “Gənclik
nəğmələri” adlı almanax işıq üzü
görüb və burada toplanan şeirlərin, hekayələrin
müəllifləri olan bizlər Ziyalılar evinin
işıqlı salonuna toplaşmışıq. Xitabət kürsüsündə müqtədir sənətkarımız
İlyas Əfəndiyev görünür. O, bizdən
danışır, əsərlərimizi təhlil edir. Bəyəndiyi hekayələr içərisində
öz adımı eşidirəm. Dünya mənimdir!
Sevincimin həddi-hüdudu yoxdur! Görüşdən
sonra hamımız İlyas Əfəndiyevi üzük
qaşı kimi dövrəyə alırıq. O, bizi təbrik
edir, hər birimizə uğurlar arzulayır.
Sonralar
mənə İlyas Əfəndiyevlə bir neçə dəfə
görüşmək nəsib olub. Bu görüşlərdən
biri Zuğulbada-pansionatdaydı. İlyas Əfəndiyevi
gördüm, yaxınlaşıb salam
verdim və Elçini soruşdum (bu yuxarıda qeyd etdiyim
“Moskoy-Nyus” qəzeti ilə əlaqədar idi). Elçin
şəhərdə idi. İlyas müəllim
məni evə dəvət etdi. Eyvanda
oturduq, maraqlı söhbətimiz oldu. Mən Elçinin
yaradıcılığından, Abşerona həsr etdiyi əsərlərindən
danışdım və belə dedim: “Mən bakılıyam,
əslən bilgəhliyəm, yəni uşaqlıqdan
Abşeron bağlarında böyümüşəm. Elçinin əsərlərini oxuyanda mənə elə
gəlir ki, o da bakılıdır”. İlyas
müəllim gülümsündü. Mən niyə bu
qənaətə gəldiyimi izah etməyə başladım,
ümumiyyətlə, Elçinin
yaradıcılığı ilə bağlı ürək
sözlərimi dedim. İlyas Əfəndiyevin çöhrəsində
nur parladı...
Elçin
o vaxt artıq ədəbiyyatda özünü təsdiq
etmiş qələm sahibi idi. Onun haqqında həmin
dövrdə və sonrakı illərdə məşhur
yazıçı və alimlər dəyərli fikirlər qələmə
almış, Elçinin bənzərsiz
yaradıcılığını təqdir etmişdilər.
Həmin fikirlərdən bəzilərinə nəzər
salaq:
“Elçinin
hekayə və povestlərini oxuyanda qələmindəki
özünəməxsusluğun bədii çizgiləri dərhal
nəzərə çarpır... Elçinin
laboratoriyasında yerində istifadə oluna bilən bir
çox vasitələr vardır... Nüfuzedici bir nəzərlə
uzaqlara və dərinliklərə dalmaq, gözə
görünən və görünməyən ara pərdələri qaldırıb əsl
mahiyyətə, nüvəyə çatmaq meyli bu
yazıçıya xas bir keyfiyyətdir. Adi məişət
əhvalatlarını Elçin adilikdən
çıxarıb xüsusiləşdirməyi, hətta qəribələşdirməyi
bacarır. Buna yazıçı öz
xüsusi görmə, duyma, təhsil və qiymətləndirmə
məharəti ilə nail olur”.
Məmməd Arif
“Elçin
müasir həyatdan, uşaq vaxtlarından bələd
olduğu adamlar və mənzərələrdən yazır. Təsadüfi deyil ki, Abşeron
bağları və kəndləri, Xəzər dənizi onun əsərlərində
poetikləşdirilir, zahirən o qədər də parlaq və
cazibədar olmayan, hətta ilk nəzərdə
cansıxıcı görünən dar və əyri-üyrü
küçələr, dalanlar, ağ neft pilətəsilə
qızdırılan balaca otaqlar, boz, nahamvar daş divarlar belə
şairanə rənglər kəsb edir, gözümüzdə
yeni, xoş görkəmlə canlanır. Bizi əhatə edən
xarici aləm, yaşadığımız evlər, gəzdiyimiz
dəniz sahilləri, Bakı bağlarının sarı qumu,
dadlı üzüm yetirən meynələri, çadır
kimi kölgə salan tut ağacları, çılpaq
qayaları Elçinin hekayə və povestlərində daim
insan hisslərinin hərarətini, insan ürəyinin romantik
çırpıntılarını əks edir; çünki
yazıçı onları təsvir xarakterində deyil, qəhrəmanlarının
həyəcan və iztirablarının, dəruni hisslərinin
tərcümanı kimi əsərə daxil edir” .
Mirzə İbrahimov
“Elçinin
ədəbi hadisələrə obyektiv yanaşması, yeri
düşdükcə kəskin polemikalara girməsi, işin
ağırlığından qorxmaması, mühüm elmi-bədii
problemlərə nəzəri əsaslarla yanaşması əsərinin
(“Tənqid və nəsr”) sanbalını xeyli
artırmış, bu əsəri ləyaqətli bir tədqiqata
çevirmişdir.
Elçin
hələ universitetdə təhsil alarkən, mənim tələbəm
olmuş, geniş dünyagörüşü, istedadı, fəallığı
ilə diqqətimi cəlb etmişdir. Sonralar aspiranturada oxuyarkən,
onun bu keyfiyyətləri daha da inkişaf etmiş və o,
yaxşı bir müasir ədəbiyyatşünas-mütəxəssis
kimi yetişmişdir”.
Mir Cəlal
Belə
misalların sayını istənilən qədər
artırmaq olar. Ədəbiyyat aləminə qədəm basan qələm
sahibləri iki istiqamətdə özlərini təsdiq
etmiş olurlar. Ya ilk əsərindən,
ya da bir neçə kitabı nəşr olunduqdan sonra. Elçin ilk hekayələrindən ədəbiyyata
gəldi və 60 illiyində ən yüksək zirvəyə
ucaldı - Azərbaycan ədəbiyyatının
inkişafındakı böyük xidmətlərinə
görə “İstiqlal” ordeni ilə təltif olundu. Bu
münasibətlə ulu öndərimiz Heydər Əliyev xalq
yazıçısı Elçinə göndərdiyi təbrik
məktubunda demişdir: “Siz ədəbiyyatımıza
60-cı illərdə qədəm qoyaraq tez bir zamanda
tanınan istedadlı
yazıçılarımızdansınız. Həmin
dövrün ideoloji qəliblərinə sığmayan
üslubda yazıb-yaratmış və ədəbiyyatımızın
yeni mərhələsini formalaşdırmış nasirlər
arasında adınız daim hörmətlə çəkilir”.
Bu sözlər Elçin
yaradıcılığına verilən qiymətin ən
parlaq təzahürüdür.
60-cı
illər ədəbiyyatından söz düşəndə
professor Nizami Cəfərovun bir televiziya verilişində
dediyi sözləri xatırlayıram. Alimin fikri təxminən belə idi:
“60-cı illərdə ədəbiyyata gələnlərin
böyük əksəriyyəti dissident yazıçılar
idi”. Bu sözdə həqiqət var. Senzura məmurları
bunu yaxşı bilirdilər. Ona görə
də Elçinin, Anarın, Xəlil Rzanın, Fikrət
Qocanın və başqa cəsarətli qələm sahiblərinin
əsərlərinə zərrəbinlə baxırdılar.
Bir müsahibəsində Elçin müəllim həmin illəri
belə xatırlayır: “Mən ilk pyesimi - “Poçt
şöbəsində xəyal”ı 26 yaşımda
yazmışam. Onun ilk oxucusu, təbii ki,
İlyas Əfəndiyev oldu. Sonra əlyazmanı,
yaxşı yadımdadır, Yaşar Qarayevə, Yusif Səmədoğluna,
Anara, Araz Dadaşzadəyə, Rəhman Bədəlova verdim,
onda dostların arasında belə gözəl bir ənənə
var idi: oxudular, xoşlarına gəldi. Ancaq o
vaxt - 1969-70-ci illərdə “Qlavlit” bu pyesin tamaşasına
icazə vermədi. Səbəb də bu
idi ki, əsər bədbinlik aşılayır, gənc sovet
qızlarının həyatını təhrif edir və s.”
Bu sətirləri oxuyanda və ümumiyyətlə,
bu gün həmin illərin ədəbiyyatına, o cümlədən
Elçinin cəsarətli əsərlərinə nəzər
saldıqda Nizami Cəfərovun yuxarıda qeyd etdiyim sözlərinə
haqq qazandırmamaq mümkün deyildir.
Yuxarıda
qeyd etdiyim kimi, Elçinin yaradıcılığı,
ictimai fəaliyyəti çoxşaxəlidir. Bu çoxşaxəliliyi əhatə
etmək, əlbəttə, çox çətindir. Elçin haqqında dissertasiyalar yazılıb,
kitablar çap olunub, onun pyesləri Azərbaycanın
hüdudlarından kənarda da tamaşaya qoyulub. Kitabları İsveçrədə, Çində,
İraqda, İranda, Almaniyada, Slovakiyada, Rusiyada, Afrika ölkələrində
nəşr olunub. Təkcə Türkiyədə
Elçinin 10-dan artıq kitabı çıxıb, pyesləri
qardaş ölkənin teatrlarında nümayiş etdirilib.
Bunu göstərmək kifayətdir ki, bu qələm
sahibinin kitablarının ümumi tirajı 5 milyondan
çoxdur. “Ah Paris, Paris”, “Mənim sevimli dəlim”,
“Arılar arasında”, “Teleskop” və s. pyesləri
tamaşaçılar tərəfindən böyük rəğbətlə
qarşılanıb.
Onun
kinodramaturgiya sahəsində də böyük uğurları
var. Ssenariləri əsasında bir sıra yadda qalan filmlər
çəkilmişdir.
“Bağ mövsümü”, “Arxadan vurulan zərbə”
,“Gözlə məni” (İlyas Əfəndiyevin “Mahnı
dağlarda qaldı” pyesi əsasında) “Gümüşü
furqon”, “Sahilsiz gecə” və s. Bir sözlə, 22 adda kino sənəti
nümunələri yazıçının bir ssenarist kimi səmərəli
fəaliyyətinin göstəricisidir.
Bu
yaxınlarda Türkiyə və Azərbaycan kinematoqrafçılarının
Elçinin “Mahmud və Məryəm” əsəri əsasında
birgə lentə aldıqları eyni adlı film də
yazıçının respublikamızın
hüdudlarından kənarda qazandığı
çoxsaylı uğurlardan biridir.
Elçin
çox səriştəli, özü də rejissorla iş
prosesində tələbkar ssenaristdir. Bu fikri
söyləyərkən mərhum dostum, kinorejissor Kamil
Rüstəmbəyovun sözlərinə istinad edirəm.
O, deyirdi: “Elçin müəllimin “Gözlə məni”
ssenarisi kino sənətinə dərindən vaqif olan peşəkar
bir qələm sahibinin əsəridir. Mən
rejissor ssenarisini yazarkən heç bir çətinlik çəkmədim.
Hər şey yerindəydi. Elçin
müəllim mənə inanırdı. Rejissor
üçün bu vacib şərtdir”.
Elçin
Əfəndiyev həm də nüfuzlu alimdir, filologiya elmləri
doktoru, professordur. Onun nəzəri əsərləri öz
aktuallığı, dərin elmi ümumiləşdirmələri
və cəsarəti ilə seçilir. Onun
“Azərbaycan bədii nəsri ədəbi tənqiddə”
adlı namizədlik və “Ədəbiyyatda tarix və
müasirlik” adlı doktorluq dissertasiyaları müasir ədəbiyyatşünaslığımızın
ən sanballı əsərlərindəndir. Professor
Nizaməddin Şəmsizadə yazır: “Məncə, elmi və
bədii təfəkkürü öz şəxsiyyətində
uğurla birləşdirə bilməsi Elçinin həm bədii
yaradıcılığına, həm də tənqidinə
fayda gətirib, bədii irsində analitik
başlanğıcın, tənqidində isə
emosionallığın güclənməsinə səbəb
olub. “Tənqid və ədəbiyyatımızın
problemləri”, “Klassiklər və müasirlər” kimi
fundamental kitablarında, monoqrafiya və məqalələrində,
qəzet və jurnal yazılarında o, həm klassik irsin
öyrənilməmiş səhifələri, həm də
cari ədəbi proseslə bağlı ağrılı
problemlərdən professional səriştə ilə yazıb”.
Elçinin
fədakar fəaliyyətinin bir sahəsi də “Vətən”
cəmiyyəti ilə bağlıdır. Xaricdə yaşayan azərbaycanlıları
öz ətrafında birləşdirən bu cəmiyyət
ilk gündən görkəmli ictimai xadim Elçin Əfəndiyevin
başçılıq etdiyi tarixi bir qurum idi.
Yaxşı yadımdadır, bu qurumun iş təcrübəsi
Azərbaycan Respublikasının Ali Sovetində geniş
müzakirə olundu və “Vətən” cəmiyyəti xariclə
əlaqəsi olan bütün sahələrə (o vaxt mən
Azərbaycan radiosunun xarici verilişlərinə nəzarət
edirdim) nümunə göstərildi.
Bu cəmiyyətin
fəaliyyəti ilə bağlı mən çox
mühüm bir məqama toxunmaq istəyirəm. 1990-cı ilin 20 yanvar faciəsindən
sonra Azərbaycanın xariclə yeganə əlaqəsi “Vətən”
cəmiyyəti ilə idi. O dəhşətli günlərdə
“Vətən” cəmiyyəti sovet qoşunlarının
Bakıda törətdikləri qanlı hadisələr
haqqında materiallar hazırlayıb xarici ölkələrin
informasiya agentliklərinə və məşhur dövlət
xadimlərinə göndərirdi. Hətta o vaxt
“Vətən” cəmiyyəti ümummilli liderimiz Heydər Əliyevin
Moskvada Azərbaycan nümayəndəliyindəki tarixi
çıxışının da video kasetini əldə
etmiş, xarici ölkələrə göndərmişdi.
Bütün bu unudulmaz tarixi xidmətin
sükanı arxasında bizim görkəmli vətəndaş-yazıçımız
Elçin Əfəndiyev dayanırdı.
Bu
gün Elçin Əfəndiyev yüksək dövlət vəzifəsində
fəaliyyət göstərir, Azərbaycan Respublikası
Baş nazirinin müavinidir. Öz sözləri ilə
desək, o, əlbəttə, “ilk növbədə
yazıçı, ondan sonra isə müstəqil Azərbaycan
dövlətinin quruculuğu prosesində iştirak edən və
imkanları daxilində əlindən gələni əsirgəməyən
bir vəzifə adamı”dır. Onun
bütün fəaliyyət sahələrindəki
yaratdıqları, gördüyü işlər təqdirə
layiqdir.
Elçin
müəllim çox diqqətcil insandır. Vəzifə heç vaxt
onu bizdən ayırmayıb. Müxtəlif
tədbirlərdə, görüşlərdə həmişə
bizlərlə çox səmimi görüşür, hal-əhval
tutur, qələm dostlarının problemləri ilə
maraqlanır, ən başlıcası, insanlara
yaxşılıq edir. Elçin Əfəndiyev
Yazıçılar İttifaqının katibi olanda da biz onu
qədirbilən, insanlara yaxşılıq etməkdən
zövq alan, gənclərə
böyük qayğı göstərən, xeyirxah bir insan
kimi tanıyırdıq. Bu, çox
böyük keyfiyyətdir və mən deyərdim İlyas Əfəndiyev
ocağına xas olan bir özəllikdir.
Heç vaxt
unutmaram, 75 yaşımla əlaqədar olaraq Elçin müəllim
mənə, ev ünvanıma çox səmimi
bir təbrik məktubu göndərmişdi. Həmin gün
İlyas Əfəndiyevin oğlu, Elçin müəllimin
qardaşı, görkəmli maarif xadimi, Mədəniyyət
və İncəsənət Universitetinin rektoru, professor
Timuçin Əfəndiyev Elmi Şurada məni ad
günüm münasibətilə təbrik edəndə dərin
təşəkkürümü bildirdim və əlavə
olaraq dedim: “Bu gün mən Baş nazirin müavini, xalq
yazıçısı Elçin Əfəndiyevdən təbrik
məktubu almışam. Bu məktubda Elçin
müəllim mənə layiq olduğumdan da yüksək qiymət
verib”.
Bir dəfə
də Qafqaz Universitetində professor-müəllim heyəti və
tələbələrlə xalq yazıçısı
Elçinin görüşü zamanı adımı çəkən
və məni Nazim Hikmət tədqiqatçısı kimi təqdim
edən də məhz Elçin müəllim olmuşdu. Belə diqqət, belə nəciblik
heç vaxt unudulmur!
Sözümün
sonunda mən yenə Elçin müəllimin “Qocalığa
hələ çox qalıb” adlı əsərinə
qayıtmaq istəyirəm. Bu əsərdə mən,
fəaliyyəti bir insan ömrünə sığmayan Elçin
Əfəndiyevin böyük ürəyini gördüm.
Bu ürəyin sahibi çox yaşamalı,
bizi, ümumiyyətlə, bütün oxucularını,
tamaşaçılarını varlığı və
yeni-yeni əsərləri ilə sevindirməlidir.
70
yaşınız mübarək olsun, Elçin müəllim!
Aqşin Babayev,
filologiya elmləri doktoru,
professor
Ədəbiyyat qəzeti.-
2013.- 12 aprel.- S.3.