Mirzə Cəlil günləri

Şərqin ilk satirik mətbuat orqanı olan “Molla Nəsrəddin” jurnalının nəşri tarixi hər il Naxçıvan Dövlət Universitetində milli jurnalistika və ictimai fikir tarixində mühüm hadisə kimi qeyd olunur. Universitetdəki “XII Cəlil Məmmədquluzadə günləri”nə isə “Cəlil Məmmədquluzadənin sənət idealları və müasir dövr” mövzusunda keçirilən elmi konfransla start götürdü.

Konfransda giriş sözü ilə çıxış edən rektor, akademik İsa Həbibbəyli böyük mütəfəkkir, demokrat yazıçı Cəlil Məmmədquluzadənin Azərbaycan ədəbiyyatında, ictimai-fikir tarixindəki əvəzsiz yerindən danışdı. Görkəmli mirzəcəlilşünas İsa Həbibbəyli Cəlil Məmmədquluzadəni milli istiqlal ədəbiyyatının sərkərdəsi kimi dəyərləndirərək onun milli dirçəliş və tərəqqi, müstəqillik uğrunda apardığı əhəmiyyətli mübarizədən bəhs etdi. Konfransda tarix-filologiya fakültəsinin dekanı, filologiya üzrə fəlsəfə doktoru, dosent İman Cəfərov “Azərbaycan ədəbiyyatşünaslığında Cəlil Məmmədquluzadə yaradıcılığı və dünya ədəbiyyatı məsələsi”, Beynəlxalq münasibətlər kafedrasının müdiri, fəlsəfə doktoru, dosent Yusif Hüseynov “Cəlil Məmmədquluzadə və milli mənafe məfkurəsi”, Azərbaycan ədəbiyyatı kafedrasının dosenti, filologiya üzrə fəlsəfə doktoru Əbülfəz Əzimli “Cəlil Məmmədquluzadə yeni dövrün yeni üslublar yazıçısıdır”, Azərbaycan dilçiliyi kafedrasının dosenti, filologiya üzrə fəlsəfə doktoru Qalibə Hacıyeva “Cəlil Məmmədquluzadə yaradıcılığında dil problemi və anomastik vahidlərin üslubi xüsusiyyətləri” mövzusunda məruzələr etdilər. Məruzəçilər böyük yazıçı və nasir, jurnalist Cəlil Məmmədquluzadənin həyat və fəaliyyəti, nəsr, dramaturgiya yaradıcılığı, bədii publisistikası, dramaturji üslubu, yaradıcılığını dil və janr cəhətdən səciyyələndirən xüsusiyyətlər barədə ətraflı məlumat verdilər. Azərbaycan ədəbiyyatında kiçik hekayənin böyük ustadı, tənqidi-realist nəsrin dahi yaradıcısı kimi geniş şöhrət qazanmış, Azərbaycan dramaturgiyası tarixində tragikomediya mərhələsinin, mətbuatda isə bütün Şərqdə satirik publisistikanın yaradıcısı olan Mirzə Cəlilin bədii irsi vətəndaş ziyalılıq, milli məfkurəyə sədaqət nümunələri kimi hər zaman aktualdır, gənc nəslin faydalanacağı böyük məktəbidir. Tarix-filologiya fakültəsinin tələbələri görkəmli ədibin əsərlərindən nümunələr, ona ithaf olunmuş şeirləri bədii qiraət etdilər.

Qeyd edək ki, “Cəlil Məmmədquluzadə günləri” çərçivəsində, muzey ekskursiyaları, karikatura və kitab sərgiləri, ustad - Mirzə Cəlildən bəhs edən bədii və sənədli filmlərə baxış keçiriləcək.

Mehriban SULTAN,

NDU-nun Mətbuat

şöbəsinin müdiri

Ədəbiyyat qəzeti.- 2013.- 19 aprel.- S.8.