Qabdulla Tukay anıldı

Rusiya İnformasiya və Mədəniyyət Mərkəzində (RİMM) böyük tatar şairi, ictimai xadim və tərcüməçi Qabdulla Tukayın doğum günü münasibətilə tədbir keçirilmişdir.

RİMM-in mətbuat xidmətindən AzərTAc-a bildirmişlər ki, “Tuqan Tel” Respublika Tatar Mədəniyyəti Cəmiyyəti ilə birlikdə təşkil olunmuş tədbirdə Azərbaycanın həmvətənlər, gənclər və ictimai təşkilatlarının, yaradıcı dairələrin, tələbə gənclərin nümayəndələri iştirak etmişlər.

“Tuqan Tel” gənclər birliyinin üzvləri Q.Tuqayın həyat və yaradıcılığından, klassik milli poeziyanın, tatar ədəbi dilinin banisi kimi onun rolundan danışmışlar. Bu böyük şairin bir çox şeirləri oxunmuşdur. “Tuqan Tel” folklor ansamblı tatar və rus dillərində Q.Tukayın sözlərinə yazılmış mahnılar ifa etmişdir. Tamaşaçılara “Şurale” nağıl poemasının motivləri əsasında hazırlanmış rəqslər göstərilmişdir.

Nizami adına Ədəbiyyat İnstitutunun əməkdaşı, filologiya elmləri namizədi Mənzər Həsənovanın “Qabdulla Tukay Azərbaycan ədəbiyyatşünaslığında” kitabının təqdimatı canlı maraq doğurmuşdur.

Ədəbiyyat qəzeti.- 2013.- 19 aprel.- S.5.