Mübarək

Xalq yazıçısı Elçinin yubileyinə

Bilsən necə coşur bayırda külək, -

Zəfər himni qoşur bayırda külək!

Necə qırır göydə buludu şimşək,

Tufana çevirir sükutu şimşək!

Həyat qazan kimi qaynayır, qardaş,

Bir külüng olaydı əllərimdə kaş,

Ah, necə çapardım o daş qəfəsi.

Axı ruhu qırır sükutun səsi!

Yığ şələ-küləni, düş qabağıma, -

O doğma diyara aparım səni.

Gör dağ necə uçur, çay necə daşır!

Quzular qoyuna necə qarışır!

Bulanaq yolların palçıqlarına,

Diksinək yağışın qılçıqlarına.

Üzünü şəlalə köpüyündə yu,

Uçsun paltarından benzin qoxusu.

Qaçsın gözlərinin əfəl yuxusu.

Hopsun saçlarına yarpızın ətri,

Nərgizin tozu.

Hər yarpaq ortası bir şeh dənizi,

Hər arı harayı, min aşıq sazı,

Gəl, bu yol zirvələr aşmaq yoludu.

Yoxsa təklik səni üzər, qardaşım,

Ey İlyasdan gələnə sər, qardaşım.

Bir də nə vaxt dönər o, dahi insan,

Səni bir də nə vaxt yazar, qardaşım?

Qanında Qubanın toxumları var,

Fətəli babanın toxumları var!

Dilində üzümün salxımları var.

Londonda tamaşan anşlaqla gedir,

Nə işdi, orda da qohumların var?

Qardaş, cik-pikinə bələdəm sənin,

Kişi soy-kökünə bələdəm sənin!

Şöhrət çələnginlə sakit yaşarsan,

Coşanda cənginə bələdəm sənin, -

Xallı pələnginə bələdəm sənin!

Elçin, yetmiş yaşın mübarək olsun!

Çiynində bəxt quşun mübarək olsun!

Təzə əsərini gördük səhnədə,

Tərtibin, qurluşun mübarək, Elçin!

Alqışlar altında gözündən axan,

Mübarək göz yaşın, mübarək, Elçin!

Yusif Həsənbəy

Ədəbiyyat qəzeti.- 2013.- 26 aprel.- S.5.