Rafiq Babayev-60

Hörmətli Rafiq müəllim!

Sizi 60 yaşınızın tamam olması münasibətilə təbrik edirik.

Siz 1953-cü ildə Ordubad rayonunun Aza kəndində dünyaya gəlmiş, 1975-ci ildə Azərbaycan Dövlət Pedaqoji İnstitutunun Naxçıvan filialını Azərbaycan dili və ədəbiyyat ixtisası üzrə bitirmiş, 1979-1994-cü illərdə "Yeni Ordubad", "El həyatı" qəzetlərində məsul katib və redaktor müavini vəzifələrində çalışmış, 1976-79-cu illərdə Aşağı Aza kənd orta məktəbində müəllim, 1994-2004-cü illərdə isə direktor işləmisiniz. 2004-cü ildən AMEA Naxçıvan bölməsinin folklorşünaslıq şöbəsində elmi tədqiqatla məşğul olmuş və Naxçıvan özəl universitetində müəllim kimi fəaliyyət göstərmisiniz. İlk hekayəniz 8-ci sinifdə oxuyanda Ordubad rayon qəzetində dərc olunmuş, müxtəlif illərdə "Arazın işıqları", "Araz-2", "Araz-3" almanaxları və kitablarda "Uzun yuxu", "Arxadan gələn adam", "Təkbətək", "Axırıncı axşam", "İlğım", "Zühur", "Ölüm mələyi" kimi roman, povest və hekayələriniz çap olunmuşdur. 1988-ci ildən Azərbaycan Yazıçılar Birliyinin üzvüsünüz.

2009-cu ildə "Azərbaycan folklorunun regional xüsusiyyətləri (Naxçıvan folkloru)" mövzusunda dissertasiya müdafiə edərək filologiya üzrə fəlsəfə doktoru elmi dərəcəsi almış, hal-hazırda filologiya üzrə elmlər doktoru adı almaq üçün dissertasiya üzərində işləyirsiniz. Sizin "Naxçıvan folkloru: bəşərilik, türk-lük, regionallıq" monoqrafiyanız, "Yol gələr Ordubada", "Azərbaycan nağılları. Naxçıvan", "Naxçıvan folkloru" kitablarınız, həmçinin tərtibçilərindən və redaktorlarından biri olduğunuz "Azərbaycan folkloru antologiyası. Naxçıvan folkloru" 3 cildliyi folklorşünaslıq elmimizin layiqli nümunələri sırasındadır.

Hörmətli Rafiq müəllim!

Sizi 60 illik yubileyiniz münasibətilə ürəkdən təbrik edir, sizə uzun ömür, cansağlığı, elmi və bədii yaradıcılığınızda yeni yaradıcılıq uğurları arzulayırıq.

Azərbaycan Yazıçılar Birliyi

Naxçıvan Yazıçılar Birliyi

Ədəbiyyat qəzeti.- 2013.- 6 dekabr.- S.7.