Bakıda xalq şairi Məmməd Arazın 80 illiyinə

həsr olunmuş yubiley tədbiri keçirildi

Dekabrın 9-da Mədəniyyət və Turizm Nazirliyinin təşkilatçılığı ilə Azərbaycan Dövlət Akademik Milli Dram Teatrında xalq şairi Məmməd Arazın 80 illiyinə həsr olunmuş təntənəli yubiley tədbiri keçirilmişdir.

AzərTAc xəbər verir ki, Azərbaycan Respublikasının Prezidenti İlham Əliyevin müvafiq sərəncamına əsasən keçirilən tədbirdə dövlət və hökumət rəsmiləri, Milli Məclisin deputatları, elm və mədəniyyət xadimləri, ədəbi ictimaiyyətin nümayəndələri iştirak etmişlər.

Tədbirdə çıxış edən AMEA-nın müxbir üzvü, Milli Məclisin mədəniyyət komitəsinin sədri Nizami Cəfərov milli poeziyamızın görkəmli nümayəndəsi Məmməd Arazın həyat və yaradıcılığından danışmışdır.

Bildirilmişdir ki, Azərbaycanda istiqlal təfəkkürünün formalaşmasında və təkamülündə Məmməd Araz yaradıcılığının xüsusi rolu olmuşdur. Onun poeziyasının həyat fəlsəfəsi milyonlarla insanı valeh etmiş, onlara insanpərvərlik ruhu və mənəvi paklıq nuru bəxş etmişdir. Şairin xalqımızın əsrlərlə formalaşmış yüksək mənəvi dəyərlərini tərənnüm edən əsərləri insanlara vətənpərvərlik və mübarizlik ruhu aşılamışdır. Diqqətə çatdırılmışdır ki, vətəndaşlıq hisslərinin tərənnümü, fikir dərinliyi və sadəlik, poetik təfəkkürün genişliyi Məmməd Araz şeirlərinin səciyyəvi xüsusiyyətləridir. Məhz bu kimi yüksək bədii keyfiyyətlərə görə şairin qələminə məxsus əsərlər geniş oxucu kütləsinin rəğbətini qazanmışdır.

Nizami Cəfərov demişdir ki, Məmməd Araz Azərbaycan poeziyasına yeni üslub və düşüncə, üsyankarlıq və tarix gətirmişdir. Onun özünəməxsus üslubu zaman keçdikdə daha da seviləcəkdir. Qeyd edilmişdir ki, zamanın təqibləri Məmməd Arazın poetik iradəsini sındıra bilməmişdir. Onun olduqca sadə dilinin arxasında mürəkkəb mətləblər və mülahizələr vardır. O, artıq Azərbaycan xalqının təfəkküründə ədəbi obraza çevrilmişdir.

Azərbaycan Ağsaqqallar Şurasının sədri, Milli Məclisin deputatı Fəttah Heydərov Məmməd Arazla bağlı xatirələrini bölüşmüşdür. Bildirmişdir ki, Məmməd Araz yaradıcılığı tarix boyu yaşayacaqdır. Çünki onun əbədiyaşar poeziyası Azərbaycanın hər bir guşəsində sevilir.

Şairin ailəsi adından çıxış edən yazıçı, Milli Məclisin deputatı Aqil Abbas Məmməd Arazın 80 illik yubileyinin dövlət səviyyəsində keçirilməsi üçün Prezident İlham Əliyevin imzaladığı sərəncamın əhəmiyyətindən danışmış, dövlətimizin başçısına minnətdarlığını bildirmişdir.

Tədbirdə, həmçinin şairin sözlərinə bəstələnmiş mahnılar ifa edilmiş, şeirlərindən nümunələr səsləndirilmişdir.

Ədəbiyyat qəzeti.- 2013.- 13 dekabr.- S.8.