Mədəniyyətimizin tükənməz xəzinəsi

Azərbaycan Dövlət Mədəniyyət və İncəsənət Universitetinin 90 illiyinə həsr olunur

Azərbaycan Dövlət Mədəniyyət və İncəsənət Universitetinin 90 illiyinin dövlət səviyyəsində bayram edilməsi hamımız üçün iftixar və qürur mənbəyidir. Hər birimiz fəxr edirik ki, Azərbaycan mədəniyyəti tarixində misilsiz xidmətləri olan bu unikal ali məktəbdə çalışırıq. Universitetimizin inkişafı çoxumuzun gözləri önündə baş verib. Bu gün mədəniyyətimizin elə bir sahəsi yoxdur ki, orada bizim məzunlarımız çalışmasın. Azərbaycan teleməkanının təşəkkül və inkişafında, teatr və kino sənətimizin yüksəlişində, mədəni-maarif müəssisələrinin çoxşaxəli fəaliyyətində ADMİU-nun rolu böyükdür.

Televiziyanın ilk addımlarının şahidi olduğum illərdə tanınmış diktorlardan, aparıcılardan, rejissorlardan tutmuş sıravi işçilərə qədər böyük bir sənət ordusu universitetimizin yetirmələri idi. İllər keçdikcə bu ordunun sıraları artdı, onlar Azərbaycan teleməkanının salnaməsini yaratdılar. Bu ənənə indi də davam edir. Bu gün Azərbaycanda mövcud olan mərkəzi telekanallardan başqa, regionlardakı televiziya studiyalarında da çalışanların çox böyük əksəriyyəti universitetimizin məzunlarıdır. Doxsan ilin uğurları çoxdur və onları əhatə etmək çətindir.

Mən Azərbaycan Dövlət Mədəniyyət və İncəsənət Universitetinin 90 illiyinin qeyd edildiyi, kollektivimiz üçün çox fərəhli olan bu günlərdə, ali təhsil ocağımızın son 30 ildəki inkişaf mərhələsindən danışmaq istəyirəm. Bu mərhələdən söz açmaq zəruri və məqsədəuyğundur. Çünki universitetin kadr potensialı, mədəniyyət və incəsənətimizin bütün sahələrini əhatə edən yeni ixtisasların açılması, ildən-ilə genişlənən beynəlxalq əlaqələr, xarici ölkələrin ali təhsil ocaqları ilə imzalanan niyyət protokolları, müqavilələr,-bütün bunlar məhz bu illərin bəhrəsidir. İncəsənət institutunun universitet statusu alması, bu ali məktəbin ulu öndərimizin göstərişi ilə yeni bina ilə təmin edilməsi, müxtəlif ixtisaslar üzrə yeni fakültə və kafedraların açılması, xarici ölkələrdən universitetimizə təhsil almağa gələn tələbələrin sayının ildən-ilə çoxalması, təhsilimizin Avropaya inteqrasiya prosesindəki iştirakı son 30 ilin nailiyyətləridir. Bu qazanılmış uğurlarda, Azərbaycan Dövlət Mədəniyyət və İncəsənət Universitetinin rektoru, Beynəlxalq Humanitar Avropa-Asiya Akademiyasının həqiqi üzvü, akademik Fuad Qasımzadənin təbiri ilə desək, sənətşünaslıq sərkərdəsi, professor Timuçin Əfəndiyevin böyük xidmətləri vardır. Dəyərli, monumental əsərlərin müəllifi olan professor Timuçin Əfəndiyev ADMİU-nun inkişafı və onun dünya miqyasında tanınması üçün gərgin əmək sərf etmiş, bu gün də etməkdədir. Son onilliklərdə Azərbaycan Dövlət Mədəniyyət və İncəsənət Universiteti yüksək bədii və intellektual bazası olan, dünya təhsil standartlarına cavab verən bir ali məktəbə çevrilmişdir.

Teatr İnstitutunun ilk məzunlarından, xalq yazıçısı Hüseyn Abbaszadə uzun fasilədən sonra universitetlə yenidən tanışlığını aşağıdakı sözlərlə ifadə etmişdi: “Düzü, Mədəniyyət və İncəsənət Universitetində gördüyüm ürəkaçan yeniliklər, gözəl tədris şəraiti məni çox sevindirdi. Fərəhlidir ki, bu işlərin hamısı, səliqə-sahmanı, nizam-intizamı sevən Timuçin Əfəndiyevin universitetə rektor təyin edilməsindən sonra yaradılıb”.

Azərbaycan Dövlət Neft Akademiyasının rektoru, professor Siyavuş Qarayevin bu sözləri də eyni fikri ifadə edir. O, yazır: “Görün, səhnəmizdə, radio və televiziyamızda, estradamızda, mədəniyyət və elm mərkəzlərində ADMİU-nun nə qədər tələbəsi, yetirməsi çalışır. Universitetin rektoru Timuçin Əfəndiyev Azərbaycan Dövlət Mədəniyyət və İncəsənət Universitetinə rəhbərlik etdiyi müddətdə həm sənətimizi, həm də elmimizi durmadan inkişaf etdirmiş, uzun illər Azərbaycanda olmayan sənət, elm sahələrinin tədrisinə həyat, isti nəfəs bəxş etmiş, onların inkişafının və təkmilləşməsinin qeydinə qalmışdır”.

Bu sözlər təkzibedilməz bir həqiqətdir. Nailiyyətlərimizin qazanılması sahəsində professor-müəllim heyətinin fəaliyyətini əməli surətdə istiqamətləndirən professor Timuçin Əfəndiyev universitetin 90 illiyinə həsr etdiyi “Mədəniyyət və incəsənətimizin məbədgahı” adlı kitabında yazır: “ADMİU-nun professor-müəllim heyəti kadr hazırlığının müasir dövrün tələbləri səviyyəsində qurulması, Azərbaycan təhsilinin dünyanın qabaqcıl təhsil sisteminə hərtərəfli inteqrasiya olunması üçün var qüvvəsi ilə çalışır, dövlətçiliyimizin, milli maarifçilik strategiyamızın inkişafına fədakarlıqla xidmət edir”.

Belə fədakarlıqla çalışmanın əsas sirri universitet rəhbərliyinin yaratdığı saf mühit və əsl yaradıcılıq ab-havasıdır. Bu mühit və yaradıcılıq sferasının sayəsindədir ki, təhsil ocağımızın müəllimləri adları Azərbaycanın mədəniyyət, elm və ədəbiyyat tarixinə qızıl hərflərlə yazılmış Əbdürrəhim bəy Haqverdiyev, Cəfər Cabbarlı, Hüseyn Cavid, Abbas Mirzə Şərifzadə, Ülvi Rəcəb, Kazım Ziya, Mikayıl Rəfili, Əli Sultanlı, Mehdi Məmmədov, Adil İsgəndərov, Niyazi, Mikayıl Abdullayev, Tahir Salahov və bu kimi məşhur sələflərinin yolunu ləyaqətlə davam etdirir, Azərbaycan mədəniyyətinin inkişafı, onun dünya miqyasında tanınması işinə xidmət edir, əllərindən gələni əsirgəmirlər.

ADMİU-nun son onillərdəki fəaliyyətində nəzərə çarpan mühüm keyfiyyətlərdən başlıcası universitet kollektivinin dövlətçilik prinsiplərinə, ulu öndərimiz Heydər Əliyevin ölməz ideyalarına sədaqətidir. Bu, imtahan biletlərinin suallarından, mühazirələrdən, elmi-tədqiqat işlərindən tutmuş, burada keçirilən tədbirlərə qədər hər sahədə özünü aydın şəkildə göstərir. Bu elmi-tədqiqat işlərinə və tədbirlərə misal olaraq: “Azərbaycan mədəniyyəti və incəsənəti Heydər Əliyevin azərbaycançılıq ideologiyasının ideya-fəlsəfi əsası kimi”, “Mən fəxr edirəm ki, azərbaycanlıyam”, “Heydər Əliyev mədəniyyət siyasətinin qurucusudur”, “Azərbaycan bəstəkarlarının yaradıcılığında Heydər Əliyev obrazının təcəssümü”, “Heydər Əliyevin ədəbi-irs təlimi azərbaycançılıq kontekstində”, “Heydər Əliyev və milli təhsil sisteminin inkişaf strategiyası”, “Heydər Əliyev ideya-nəzəri irsində insan amili”, “Heydər Əliyev və Azərbaycan gəncliyi” və s. göstərmək olar.

Universitetdə Azərbaycan Respublikasının Prezidenti cənab İlham Əliyevin yorulmaz fəaliyyətinə həsr olunmuş “Əsrə bərabər on il”, “İlham Əliyevin Azərbaycan mədəniyyətinə verdiyi töhfələr”, habelə “Heydər Əliyev Fondu”nun prezidenti, millət vəkili Mehriban Əliyevanın mədəniyyətimizin dünya miqyasında tanıdılması prosesindəki səylərini əks etdirən “Milli mədəniyyətlərin yaxınlaşmasında “Heydər Əliyev Fondu”nun rolu”, “Azərbaycan mədəniyyətinin inkişafında YUNESKO və İSESKO-nun xoşməramlı səfiri Mehriban Əliyevanın rolu” adlı tədbirlər və bu mövzularda nəşr edilmiş elmi-tədqiqat işləri rəğbətlə qarşılanmışdır.

Məlumdur ki, bu gün milli maarifçilik sahəsində əsas vəzifə dünya təhsil sisteminə inteqrasiya problemidir. Bu sahədə artıq universitetimiz tərəfindən təqdirəlayiq addımlar atılmışdır. ADMİU-nun Almaniyanın “Let İnternet” şəbəkəsinə daxil olması, eyni zamanda YUNESKO-nun “Auşberq”, “Tempus-Tasis” mədəniyyət proqramlarında iştirakı, 2011-2013-cü illər üzrə Avropa magistr proqramına qoşulması və başqa tədbirlərin həyata keçirilməsi fikrimizi aydın şəkildə əks etdirir.

Bundan əlavə, universitetin professor-müəllim heyətinin elmi fəaliyyətində inteqrasiya prinsipləri prioritet istiqamət təşkil edir. Bununla əlaqədar olaraq son illərdə hazırlanmış elmi-tədqiqat işlərinə nəzər salmaq kifayətdir. “Dünya mədəniyyət siyasəti”, “Qloballaşan dünyada Azərbaycan mədəniyyətinin dünya mədəniyyətinə inteqrasiyası”, “Gender və mədəniyyət”, “Qloballaşan dünyada mədəniyyət”, “Azərbaycan mədəniyyət sahələrinin informasiya fəzasında formalaşması”, “Şərq və Qərb sivilizasiyalarının milli və dini aspektləri”, “Qlobal mədəni inteqrasiya prosesinin dinamikası”, “Azərbaycanın beynəlxalq münasibətlərində Qərbə inteqrasiya”, “Azərbaycan mədəniyyətlərarası dialoq məkanı kimi”, “Kulturologiya və mədəni inteqrasiya prosesləri” və s. mövzularda yazılmış və nəşr edilmiş elmi əsərlər təhsilimizin dünyaya inteqrasiya sisteminə örnək olan nümunələridir. Bu inteqrasiya təkcə elm sahəsində deyil, təhsil sferasında, xüsusən Boloniya təhsil sisteminin tətbiqi prosesində də özünü bariz şəkildə göstərir.

Məlum olduğu kimi, Azərbaycan Respublikasının Prezidenti cənab İlham Əliyevin bu yaxınlarda, dəqiq desək, 24 oktyabr 2013-cü il tarixində imzaladığı Sərəncamla respublikamızda təhsilin inkişafı üzrə Dövlət strategiyası təsdiq edilmişdir. Bu tarixi sənəddə respublikada keyfiyyət nəticələri və əhatəliliyə görə dünya ölkələri sırasında aparıcı mövqe tutan, səriştəli müəllim və təhsil menecerlərinə, qabaqcıl texnologiyalara əsaslanan infrastruktura malik təhsil sisteminin yaradılması üçün strateji istiqamətlərdə genişmiqyaslı tədbirlər nəzərdə tutulmuşdur. Söz yox ki, bu tədbirlərin həyata keçirilməsində universitetimiz də fəal iştirak edəcək, dünyanın aparıcı təhsil standartlarına uyğun təhsil sisteminin yaradılması sahəsində var qüvvəsini sərf edəcəkdir.

Hər il Azərbaycan Dövlət Mədəniyyət və İncəsənət Universitetini yüzlərlə gənc bitirir. Azərbaycan mədəniyyətinin tükənməz xəzinəsi olan universitetimizin məzunları təkcə respublikamızda deyil, onun hüdudlarından kənarda da mədəniyyətin müxtəlif sahələrində çalışır və həmişə bu təhsil ocağını bitirdikləri ilə fəxr edir, iftixar hissi duyurlar. Universitetimizin 90 illik yubileyinin qeyd edildiyi bu günlər, bizimlə bərabər, məzunlar ordumuzun da bayramıdır. Adı universitet olsa da, əslində Mədəniyyət və İncəsənət Akademiyası funksiyasını yerinə yetirən təhsil müəssisəmiz hələ bundan sonra da uzun illər mədəniyyətimizi yüksək ixtisaslı, bacarıqlı kadrlarla təmin edəcəkdir.

Cəmi 10 ildən sonra universitetimizin 100 yaşı tamam olur. ADMİU-nun bir əsrlik tarixi gününü bayram edəcək məsləkdaşlarıma, universitetimizin rektoru, professor Timuçin Əfəndiyev başda olmaqla o günü görəcək bütün müəllimlərimizə möhkəm can sağlığı, Azərbaycan mədəniyyətinin inkişafı naminə fədakar fəaliyyətlərində yeni-yeni uğurlar arzulayıram.

Aqşin Babayev

Azərbaycan Dövlət Mədəniyyət və İncəsənət

Universitetinin kafedra müdiri, professor

Ədəbiyyat qəzeti.- 2013.- 13 dekabr.- S.4.