Yuvalara dəyməyin

Yuva qurmaq çətindi,

Min əzabı, zilləti.

Yuva qurmaq şirindi,

Yaddan çıxmaz zəhməti.

Quşun da yuvası var,

Yuvasız düşmən olsun.

Bir yuva dağıdanın

Ömrü, günü çən olsun.

Bir ağac budağında,

Bir ana qucağında,

Bir evin bucağında,

Küncündə, ocağında

Yuvalara dəyməyin,

Yuva olan budağı

And verirəm, əyməyin.

Elim pərən-pərəndi,

Gedib yurdu, yuvası.

Pozulubdu növrağı,

Gedib kefi, səfası.

Yuvalara dəyməyin,

Daşın, qumun dili var.

Yuvaların içində

Neçə ruhun sirri var.

Yuva qurmaq çətindi,

Min əzabı, zilləti.

Yuva qurmaq şirindi,

Yaddan çıxmaz zəhməti…

Səni düşünürəm

Başımı söykəyib gecənin qollarına,

Uyuyub sığalına, uyuyub tumarına,

Xəyallar dumanında,

fikrimin gümanında

Mən səni düşünürəm.

Burnumda dalğın dənizlərin

Doğma yosun qoxusu,

Hərdən səni itirmək qorxusu,

Ay gözümün perikmiş yuxusu -

Mən səni düşünürəm.

Gələrsənmi

Qar bürüyüb yolu-izi,

Xatirələr üşüyübdü.

Nağılların ocağına

Xəyalımdan köz düşübdü.

İsinməyə gələrsənmi-

Hərdən bizə gələrsənmi?

Ömür-günü düzüb sapa,

Baxa-baxa qocalırıq.

Bəzən vaxtlı, bəzən vaxtsız,

Bu dünyadan köç salırıq.

Dərdləşməyə gələrsənmi,

Hərdən bizə gələrsənmi?

Sərv boyumuz əyilibdi,

Qara gözü tor alıbdı.

Yollar yoxuş, ayaq gücsüz,

Daha yolundan qalıbdı.

Oturmağa gələrsənmi,

Hərdən bizə gələrsənmi?

Deyirlər ki, yaz gələcək,

Çəmənlər, düzlər güləcək.

fəridənin çox dərdini

Bilənlər, sonra biləcək.

Yad etməyə gələrsənmi,

Hərdən bizə gələrsənmi?

Fəridə Ləman

Ədəbiyyat qəzeti.- 2013.- 20 dekabr.- S.7.

l