"Bu, mənim vətəndaşlıq borcumdu"

Müsahibimiz Sevastopol radiosunun “Qobustan”

proqramının müəllifi Həbib Əliyevdir

- Həbib müəllim, sizi Azərbaycan mədəniyyətini, milli-mənəvi dəyərlərimizi, ədəbiyyatımızı ölkəmizdən kənarda sevərək təbliğ edən söz adamı kimi tanıyırıq. Azərbaycana hər gəlişinizdə gördüyünüz işlərlə bağlı maraqlı söhbətləriniz olur. Ancaq bugünkü söhbətimizin xüsusi bir özəlliyi var…

- Unudulmaz Məmməd Arazın şerində haqlı olaraq deyilir ki, vətən daşı olmayandan olmaz ölkə vətəndaşı. Bir Azərbaycan insanı, söz adamı kimi qürur duyuram, özümü mənən rahat hiss edirəm ki, imkanım daxilində vətəndən kənarda mədəniyyətimizi, ədəbiyyatımızı təbliğ edə bilirəm. Bu, mənim vətəndaşlıq borcumdu. Bu günə qədər Sevastopol radiosunun Azərbaycan dilində yayımlanan "Qobustan" proqramının yaradıcısı və aparıcısı kimi akademiklər Budaq Budaqov, Bəkir Nəbiyev, İsa Həbibbəyli, professorlar Qəzənfər Paşayev, Məhərrəm Qasımlı, Əliağa Cəfərov, Fəxrəddin Veysəlli, görkəmli neft ustası Xoşbəxt Yusifzadə, xalq artistləri Arif Babayev, Habil Əliyev, Canəli Əkbərov, Azər Zeynalov və başqaları haqqında verilişlər hazırlamışam, Rəsul Rzanın, Məmməd Arazın, Nüsrət Kəsəmənlinin şeirlərinə xüsusi yer ayırmışam. Muğam sənətimizin təbliği həmişə diqqət mərkzəində olub. Heydər Əliyev fondunun dəstəyi ilə həyata keçirilən Muğam müsabiqəsinin qalibi olan gənc ifaçıların lent yazılarının dönə-dönə səsləndirilməsini özümə borc bilmişəm.

- Təbii ki, bu günlərdə beynəlxalq müsabiqənin münsiflər heyəti məhz bu fəaliyyətinizi nəzərə alaraq sizi "Gümüş qələm"lə mükafatlandırıb. Bu barədə fikirlərinizi eşitmək istərdik…

- Müsabiqə oktyabrın 26-da Krımın Sudak şəhərində keçirildi. İlk mərhələyə dünyanın müxtəlif ölkələrindən yeddi yüz jurnalist qatılmışdı. Onlardan üç yüzü ikinci tura vəsilə aldı. Nəhayətdə müxtəlif nominasiyalar üzrə altmış nəfər mükafatlandırıldı. Radio üzrə Sevastopol radiosunun "Qobustan" proqramı qalib gələrək birinci yerə layiq görüldü, münsiflərin yekdil qərarı ilə mənə "Gümüş qələm" medalı və laureat diplomu təqdim edildi. Həmin müsabiqəyə dünyanın 14 ölkəsindən, o cümlədən Amerika, Rusiya, İspaniya, Belarus və Polşadan olan jurnalistlər qatılmışdı. Sevinirəm ki, bu mükafat mənə Sevastopol radiosunda on səkkiz illik səmərəli fəaliyyətimin nəticəsində verilib. Bu illər boyu həmişə Azərbaycan mədəniyyətini, ədəbiyyatını layiqincə təbliğ etməyə çalışmışam. Bilmişəm ki, hər kəs öz sahəsində mənsub olduğu xalqın milli kimliyini beynəlxalq aləmə tanıtmaq üçün daha çox, daha vicdanla əmək sərf etməlidi.

Söhbətləşdi:

Sərvaz

Ədəbiyyat qəzeti.- 2013.- 20 dekabr.- S.8.